Müəllif:Gülbəniz Hüseynli/Banco.az
Dünyanın ən böyük investisiya şirkətlərindən biri olan BlackRock, ilk kriptovalyutaya “unikal diversifikator” adını verən bir hesabat dərc edib. Hesabatda əsas diqqət tarixi qiymət dinamikasına və kriptovalyutaların proqnozlaşdırılmasının çətinliklərinə yönəlib.
Məsələyə münasibət bildirən kriptovalyuta üzrə ekspert Elnur Quliyev Banco.az- a bildirib ki, investorlar ənənəvi aktivlərlə müqayisədə kriptovalyutaları təhlil etməkdə əhəmiyyətli dərəcədə çətinlik yaşayırlar:
"Hesabatda qeyd edilən digər mühüm məqam, “rəqəmsal qızıl”ın ABŞ səhmləri və Federal Ehtiyat Sisteminin (FES) uçot faiz dərəcəsi ilə korrelyasiyasının qısamüddətli olmasıdır. Bu, Bitcoin, ənənəvi maliyyə alətlərinin əksəriyyətinə təsir edən makroiqtisadi amillərə "cüzi dərəcədə fundamental məruz qalmağı" əks etdirir. Eyni zamanda, bir çox investor üçün Bitcoin, geosiyasi gərginliklər fonunda "təhlükəsiz sığınacaq" rolunu oynayır. Artan federal büdcə kəsiri kontekstində ABŞ dollarının mümkün ucuzlaşmasından qorunmaq üçün bir vasitə kimi çıxış edə bilər”.
BlackRock-un baş direktoru Larry Fink, 22 sentyabr tarixində CNBC telekanalında bildirib ki, Bitcoin qanuni maliyyə aləti kimi qəbul edilməlidir. O, vurğulayıb ki, ilk kriptovalyuta riskləri şaxələndirməyə qadir olan rəqəmsal qızıl statusunu layiqincə alıb. Fink-in fikrincə, investorların rəqəmsal aktivlərə yanaşması dəyişir və bu, əsasən Bitcoin-in inkişafı ilə bağlıdır.
Elnur Quliyev onu da qeyd edib ki, BlackRock-un idarə etdiyi ümumi aktivlərin dəyəri 10 trilyon dollardan çoxdur. Şirkətin investisiya portfeli 2008-2024 illər ərzində 8 dəfə artıb.
