Müəllif: Tamara Mustafayeva, Banco.az
Qlobal neft tədarükü avqustda gündəlik 80 min barel artıb.
Banco.az xəbər verir ki, Beynəlxalq Enerji Agentliyinin (IEA) avqust ayı üzrə neft bazarı hesabatına əsasən, Neft İxrac Edən Ölkələr Təşkilatının (OPEC) xam neft hasilatı avqust ayında əvvəlki ayla müqayisədə gündəlik 70 min barel azalaraq 27 milyon 370 min barelə geriləyib.
Bu dövrdə OPEC-in xam neftdən başqa qeyri-ənənəvi hasilatı gündəlik 5 milyon 610 min barel olaraq qeyd edilib. Bununla da OPEC-in ötən ay ümumi neft hasilatı gündəlik 32 milyon 980 min barel olub.
Bu göstərici əvvəlki ayın səviyyəsindən gündəlik 70 min barel aşağıdır.
OPEC üzvü olmayan ölkələrin gündəlik neft hasilatı sözügedən dövrdə 150 min barel artaraq 70 milyon 550 min barelə çatıb. Beləliklə, qlobal neft hasilatı avqust ayında əvvəlki ayla müqayisədə gündəlik təxminən 80 min barel artaraq 103 milyon 530 barelə çatıb.
Ötən illə müqayisədə qlobal neft hasilatı gündə təxminən 1 milyon 400 min barel artıb.
IEA-nın məlumatına görə, bu il qlobal neft tədarükünün əvvəlki illə müqayisədə gündəlik 600 min barel artaraq 102 milyon 900 min barelə yüksələrək rekord səviyyəyə çatacağı gözlənilir.
Bizi sosial şəbəkələrdən izləyin!!
