Müəllif:Ayşən İmanova/Banco.az
Yaponiyanın avtomobil istehsalçısı “Mitsubishi Motors” Çin və Amerika avtomobil istehsalçıları ilə rəqabət aparmaq üçün “Nissan” və “Honda” alyansına qoşulmağı planlaşdırır.
Banco.az xəbər verir ki, bu barədə “Nikkei” qəzeti məlumat yayıb.
Nəşrin məlumatına görə, şirkətlər arasında məlumatların açıqlanmaması haqqında saziş bağlanıb və birləşmə ilə bağlı danışıqlar artıq başlayıb. Yeni avtomobil ittifaqı proqram təminatını standartlaşdırmağı və məhsul xətlərini genişləndirməyi planlaşdırır.
Üç şirkətin birgə istehsal həcmi ildə təqribən 8 milyon avtomobil təşkil edir. Bu, konserni Yaponiya bazarında “Toyota Motor”dan sonra ikinci ən böyük oyunçuya çevirəcək. Digər tərəfdən, "Toyota" şirkəti də "Daihatsu", "Suzuki", "Subaru", "Mazda" və "Hino Motors" ilə ittifaq qurur. Birliyin ümumi satış həcmi ildə 16 milyon avtomobil olacaq.
Sənaye insayderləri hesab edirlər ki, “Mitsubishi Motors”un “Honda” və “Nissan” ilə tərəfdaşlığı avtomobil istehsalçılarına xərcləri azaltmağa və hazırda “BYD” və “Tesla” kimi şirkətlərin üstünlük təşkil etdiyi elektrik avtomobil məkanında şiddətli rəqabətlə birgə mübarizə aparmağa kömək edəcək.
Bizi sosial şəbəkələrdən izləyin!!
