“Xəzər-Lada” ASC-nin cəmi aktivləri bu il yanvarın 1-nə 10 milyon 42 min manat təşkil edib.
Şirkətin maliyyə hesabatına görə, bu, ötən il yanvarın 1-i ilə müqayisədə 21,8% azdır.
2018-ci ildə “Xəzər-Lada”nın cəmi öhdəlikləri 92,2% azalaraq 500 min manata manata düşüb, cəmi kapitalı isə 1,7% artaraq 9 milyon 543 min manata çatıb.
Ötən il “Xəzər-Lada”nın gəlirləri 16 milyon 446 min manat (əvvəlki ilə nisbətən 21,05% çox), xərcləri isə 16 milyon 175 min manat (21,3% çox) təşkil edib. Son nəticədə şirkətin vergiyəqədərki mənfəəti 271 min manat (8,4% çox) olub ki, bunun da 54 min manat mənfəət vergisinin ödənilməsinə yönəldilib. Bununla da, biznes strukturu 2018-ci ili 217 min manat xalis mənfəətlə başa vurub.
Şirkətin xalis mənfəətinin 20%-ni yığıma, 50%-ni istehlak fonduna, 30%-ni isə dividendlərə yönəldib.
Xatırladaq ki, "Xəzər-Lada" şirkəti 2014-cü ildə yaradılıb, Rusiyanın "Avto-VAZ" şirkətinin istehsal etdiyi avtomobillərin Azərbaycanda satışı ilə məşğuldur. Onun nizamnamə kapitalı 445,8 min manatdır. Şirkətin səhmlərinin 30%-i Aleksandr Nikiforova, 29,8%-i Lyudmila Nazarenkoya, 19,4%-i Fəxrəddin Qasımzadəyə ("Xəzər-Lada"nın hazırkı prezidenti), 12,2%-i Naməddin Qasımzadəyə, 8,6%-i 146 fiziki şəxsə məxsusdur.
Report.az
