Müəllif:Mehin Qasımova,Banco.az

ABŞ prezidenti Donald Tramp keçmiş prezident Co Bayden administrasiyası tərəfindən tətbiq edilən yanacaq səmərəliliyi standartlarını ləğv edəcəklərini elan edib.

Banco.az xəbər verir ki, Trampın sözlərinə görə, bu standartlar avtomobil istehsalçılarına əlavə maliyyət, bazara isə yüksək qiymət təzyiqi yaradırdı.

Ağ Evdə çıxış edən Tramp bildirib:

“Biz Baydenin avtomobil istehsalçılarına bahalı məhdudiyyətlər qoyan, hər cür problem yaradan gülünc dərəcədə ağır standartlarını rəsmi olaraq aradan qaldırırıq.”
Prezident əlavə edib ki, bu qaydalar elektrikli avtomobil mandatı ilə birlikdə ABŞ-da avtomobil qiymətlərinin sürətlə artmasına səbəb olub.

Trampın açıqlamasından sonra ABŞ Milli Avtomobil Yolları Trafik Təhlükəsizliyi İdarəsi (NHTSA) yeni təklif yayımlayıb. Sənəddə 2031-ci ilə qədər ABŞ-da satılacaq yeni avtomobillər üçün orta yanacaq səmərəliliyi standartının gallon başına 34,5 milə endirilməsi nəzərdə tutulur. Bu göstərici Bayden dövründə təyin edilən hədəflərdən xeyli aşağıdır.

Ağ Evin izahatında qeyd olunub ki:

• əvvəlki hədəflər benzinlə işləyən avtomobillər üçün “real olmayan” tələblər qoyurdu;

• təklif olunan dəyişiklik nəticəsində yeni avtomobillərin qiyməti təxminən 1000 dollar ucuzlaşacaq;

• bu addım amerikalı ailələrə növbəti 5 il ərzində ümumilikdə 109 milyard dollar qənaət imkanı yaradacaq.

Yeni siyasətin ABŞ avtomobil bazarında necə təsir göstərəcəyi, elektrikli avtomobillərə keçidi ləngidib-ləngitməyəcəyi isə yaxın aylarda geniş müzakirə olunacaq.