Toyota-ların qlobal geri çağırılmasının Azərbaycana təsiri şərh edildi | Banco.az

Toyota-ların qlobal geri çağırılmasının Azərbaycana təsiri şərh edildi

"Toyota" avtomobillərinin Azərbaycanda rəsmi dileri olan "Toyota Bakı Mərkəzi" istehsalçı tərəfindən bir sıra modellərin geri çağırılması ilə bağlı məsələyə aydınlıq gətirib.

"Toyota Bakı Mərkəzi"nin PR meneceri Eldəniz Cəfərov verdiyi məlumata görə, geri çağırılma kampaniyası əsasən istehsal olan avtomobillərin bu və digər bazarlara nəzərdə tutulan spesifikasiyalarına uyğun təşkil olunur.

Qeyd edək ki, ötən gün Rusiya mətbuatında "Toyota Motor" şirkətinin Rusiyada "Highlander", "Land Cruiser Prado", "RAV4" və "Lexus" RX200T, RX350, RX450H modellərində ön şüşə yuyucusunun forsunkalarında aşkarlanan problemlərlə bağlı geri çağırılma kampaniyasını elan etdiyi barədə məlumat yayılıb. Rusiyadakı kampaniya çərçivəsində 80,6 min avtomobil geri çağırılıb.

Digər geri çağırılma kampaniyası isə ABŞ bazarında istismar olan "Corolla" (2011-2019-cu illər), "Matrix" (2011-2013-cü illər), "Avalon" (2012-2018-ci illər) və "Avalon Hybrid" (2013-2018-ci illər) modellərinə şamil olunur ki, məhz bu modellərdə qəza zamanı təhlükəsizlik yastıqlarının açılmaması ilə bağlı elektron nasazlıq aşkarlanıb. Kampaniya çərçivəsində ABŞ-da 2,9 mln. avtomobil, ümumiyyətlə isə, "Toyota Motor" bütün dünya üzrə 3,4 mln. avtomobili geri çağırıb.

E. Cəfərovun sözlərinə görə, "Toyota Motor" şirkəti avtomobil istehsal edib, satışa buraxdıqdan sonra mütəmadi olaraq araşdırmalar, təftişlər aparır və bu işlər hətta bir neçə il keçdikdən sonra belə öz aktuallığını itirmir.

Ən sərfəli kredit üçün müraciət et

"İstehlakçıların fikrinə uyğun olaraq, onların şikayətləri nəzərə alınır və araşdırılır ki, istehsal olunan avtomobildə hansı xırda çatışmazlıqlar var. Sonradan istehsalçı bu çatışmazlıqları aradan qaldırmaq üçün, əgər hər hansı bir detaldırsa, o detalı öz hesabına dəyişir. Proses neçə baş verir? Avtomobil sahibləri ölkədə fəaliyyət göstərən rəsmi distributor və dilerlərə yaxınlaşaraq avtomobillərində vaxtı ilə keyfiyyətsiz quraşdırılan detalı istehsalçının hesabına pulsuz dəyişdirə bilərlər. Geri çağırılma kampaniyasının əsas mahiyyəti bundan ibarətdir", - deyə E. Cəfərov qeyd edib.

O həmçinin əlavə edib ki, Rusiya və ABŞ bazarlarında elan olunan geri çağırılma kampaniyasının Azərbaycana heç bir aidiyyəti yoxdur. Belə ki, Azərbaycana rəsmi olaraq Avropa spesifikasiyasına uyğun avtomobillər gətirilir.

"Belə bir hal olsaydı "Toyota Motor Europe" bizi bu haqda məlumatlandırardı. Rusiya bazarı tamamilə fərqlidir və avtomobillər məhz bu bazara uyğun olaraq istehsal olunur. Ümumiyyətlə, "Toyota" avtomobilləri hər ölkənin öz spesifikasiyasına uyğun istehsal olunur. Azərbaycana Avropa spesifikasiyasına uyğun avtomobillər gətirilir. Lakin "Toyota" avtomobilləri sahibləri bizim rəsmi veb-səhifəyə daxil olub, xüsusi linkə keçid aldıqdan sonra avtomobillərinin BAN nömrəsini yazıb, nəqliyyat vasitələrində mövcud olan çatışmazlıq barədə məlumat ala bilərlər. Əgər istehsalçının hesabına hər hansı detal dəyişməlidirsə, orada avtomatik olaraq göstərilir. Bu xidmət ölkədə spesifikasiyasından asılı olmayaraq, istismar olunan bütün "Toyota" avtomobillərinə şamil olunur", - deyə E. Cəfərov əlavə edib.

APA

Ən sərfəli krediti almaq üçün müraciət et

Bank işi kursları

Banco Academy

Qeydiyyatdan keç