Tamara Mustafayeva, Banco.az
ABŞ-ın elektromobil istehsalçısı "Tesla" şirkəti Avropadakı ilk istehsal zavodunu açmağa hazırlaşır.
Banco.az xarici mətbuata istinadla bildirir ki, şirkətin ilk istehsal zavodu Almaniyanın paytaxtı Berlin şəhərində ilin sonunadək fəaliyyətə başlayacaq.
Berlindəki zavodda festival təşkil edən İlon Mask gələn ilin sonuna qədər "Gigafactory" adlandırılan istehsal müəssisəsində yüksək həcmli elektromobil batareyası istehsal edəcəklərini açıqlayıb. Sözügedən zavodda həmçinin həftədə 10 min avtomobil istehsal etməyi də planlaşdırdıqlarını vurğulayan Mask, "Burada istehsala başlamaq işin asan tərəfidir, çətin olan isə hədəfimizdə olan istehsal həcminə nail olmaqdır", deyə əlavə edib.
Bununla yanaşı, o, işə qəbul çağırışı edərək Avropanın hər yerindən insanları "Tesla"da işləmək üçün müraciət etməyə dəvət edib.
Qeyd edək ki, "Gigafactory"nin istehsala başlaması üçün Almaniya Ekologiya Nazirliyinin rəsmi icazəsi lazımdır ki, Mask sözügedən icazənin veriləcəyindən əmindir.
Bizi sosial şəbəkələrdən izləyin!!
