"Azərbaycan İnvestisiya Şirkəti" ASC (AİŞ) tərəfindən 21 iyul 2015-ci il tarixdə 5 mln. manat və 31 iyul 2015-ci tarixdə 1 mln. manat olmaqla, cəmi 6 mln. məbləğində vəsait 3 ay müddətinə illik 6%-lə "Texnikabank" ASC-də müvafiq hesablarda depozitə yerləşdirilib. Bu barədə Hesablama Palatasının rüblük bülletenində qeyd edilən məlumatda deyilir.

Bülletendə qeyd edilib ki, depozit müqaviləsinin şərtlərinə əsasən, ödənilməli olan depozit faizləri vaxtında təmin edilmədiyinə görə AİŞ müqavilə üzrə bütün öhdəliklərin icra edilməsi ilə əlaqədar olaraq, 8 sentyabr 2015-ci il tarixdə banka məktubla müraciət edib. Qeyd edilən müraciətin tələbləri yerinə yetirilmədiyinə görə AİŞ 16 sentyabr 2015-ci il tarixli məktubla depozitə yerləşdirilən vəsaitlərin (100%) vaxtından əvvəl geri qaytarılmasını tələb edib.

Vəsaitlərin qaytarılması bank tərəfindən təmin edilmədiyi üçün AİŞ 7 dekabr 2015-ci il tarixdə 2 saylı Bakı İnzibati-İqtisadi Məhkəməsinə depozit hesablarına daxil edilmiş əmanətlərin qaytarılması haqqında iddia ərizəsi ilə müraciət edib. Məhkəmənin 23 fevral 2016-cı il tarixli qərarı ilə "Texnikabank"a təyin edilən ləğvedici "M.M.M. Perfect Consulting" MMC-yə 6 mln. manat əmanətin və bank tərəfindən ödənilməli olan faiz ödənişləri üzrə borcların (95 min manat), cəmi 6 mln. 95 min manat məbləğdə vəsaitin ödənilməsində dəstək göstərilməsi barədə 17 fevral 2016-cı il tarixli məktubla müraciət edib.

Bülletendə qeyd edilib ki, hal-hazırkı tarixə həmin məbləğin şirkətə qaytarılması təmin edilməyib.

Sənədin müəllifləri qeyd edir ki, 2015-ci ildə AİŞ-in vəsaitinin banklara qoyulmuş depozit hesabına əldə etdiyi orta faiz gəlirləri 1 mln. 375,4 min manat olduğu halda, depozitə qoyulmuş həmin vəsaitlərdən bir hissəsinin, yəni əsas borc və faiz üzrə 6 mln. 95 min manat (gəlirdən 4,4 dəfə çox) məbləğin şirkətə vaxtında qaytarılmaması bu məbləğin təminatı üzrə böyük risklərin (ümidsiz borc) yaranması ilə nəticələnib.

Mənbə: Report.az