"Rabitəbank" ASC 2016-ci il dekabrın 31-ə maliyyə nəticələrini açıqlayıb.

Banco.az bankın açıqladığı məlumata əsasən xəbər verir ki, bankın aktivlərinin həcmi 552,288 mln. manata çatıb ki, bu da ötən ilin müvafiq dövrü ilə müqayisədə 22,5% çoxdur.

2016-cı ilin sonuna bankın kredit portfeli 183,335 mln. manat olub ki, bu da 2015-ci ilin eyni dövrü ilə müqayisədə 14,5% artım deməkdir.

Maraqlıdır ki, aktivlərin cəmi 51,2%-i və ya 283,029 mln. manatı likviddir. Düzdür, likvid aktivlərin həcmi ötən il ərzində təxminən 2 dəfə artıb. 2016-cı ilin yanvarın 1-ə bankın likvid aktivlərinin həcmi 139,016 mln. manat olub.

Bankın öhdəliklərinin həcmi 30,02% artaraq 506,677 mln. manat təşkil edib.

Hesabat dövründə bankın nizamnamə kapitalı dəyişməyərək 48,5 mln. manat səviyyəsində qalıb. Məcmu kapital isə 9,35% azalaraq 61,174 mln. təşkil edib.

Bank ötən ili 12 mln. 873 min manatlıq zərərlə başa vurub.

"Rabitəbank" ASC-ə 1993-cü il 30 iyun bank əməliyyatlarının aparılması üçün Azərbaycan Resrublikası Milli Bankı tərəfindən lisenziya verilib.