Müəllif: Tamara Mustafayeva, Banco.az
BVF: Qlobal maliyyə vəziyyəti pisləşir, borc səviyyələri artmaqdadır.
Banco.az xəbər verir ki, BVF-in “Maliyyə Monitorinqi Hesabatı”na görə, artan iqtisadi və siyasi qeyri-müəyyənliklər, ölkələrin maliyyə görünüşünü daha da mürəkkəbləşdirib. ABŞ-ın tətbiq etdiyi yüksək tariflər, digər ölkələrin cavab tədbirləri və artan qeyri-müəyyənliklər, qlobal iqtisadi riskləri artırıb. Dezenflasiya prosesi yavaşlayıb, bir çox ölkədə iqtisadi artım proqnozları aşağıya doğru yenilənib.
Maliyyə sahəsində isə ölkələr həm məhdud büdcə imkanları, həm də artan dövlət borcu ilə üz-üzədir. Xüsusilə Avropada artan müdafiə xərcləri və azalan xarici yardım mühiti vəziyyəti daha da ağırlaşdırır. Rapor vurğulayır ki, bu şəraitdə ölkələr üçün maliyyə strukturlarını tənzimləmək əsas prioritet olmalıdır.
BVF orta müddətli etibarlı maliyyə strategiyasının — borcun azaldılması, maliyyə tamponlarının yaradılması və uzunmüddətli artımın dəstəklənməsi baxımından həyati əhəmiyyət daşıdığını qeyd edir.
Hesabat 2024-cü ildə qlobal maliyyə vəziyyətinin pisləşdiyini, amma ölkələr arasında ciddi fərqlər olduğunu bildirir. Qlobal büdcə kəsirinin bu il ÜDM-in 5,1%-nə çatacağı, dövlət borcunun isə 2025-də 95,1%-ə, 2030-cu ildə isə 99,6%-ə yüksələcəyi gözlənilir.
Borc artımına ən çox töhfə verən ölkələr arasında ABŞ, Çin, Fransa, Birləşmiş Krallıq, Braziliya və Cənubi Afrika göstərilir. Bu ölkələrdə yüksək səviyyədə maliyyə ehtiyaclarının da davam edəcəyi vurğulanır.
BVF ekspertləri bildirirlər ki, mövcud meyil davam edərsə, 2030-cu ilə qədər qlobal dövlət borcu pandemiya dövrünü də geridə qoyaraq ÜDM-in 100%-nə yaxınlaşacaq.
Bizi sosial şəbəkələrdən izləyin!!
