Müəllif: Tamara Mustafayeva, Banco.az
Əgər hazırsınızsa, yenidən başlayırıq, çünki qışın ən gözəl tərəfi olan sirli-sehirli bayram artıq astanadadır. Milad bayramı, ardınca da Yeni il çoxumuzun hər il səbirsizliklə gözlədiyi, qış aylarını sevməyənlərin belə üzündə təbəssüm yaradan əsas səbəbdir. Yeni başlanğıcların müjdəçisi olan hər iki bayram dünyanın müxtəlif yerlərində fərqli adət-ənənələr və böyük şövqlə qarşılanır. Bu müxtəliflikləri ekranlara çatdıran filmlərə tamaşa etmək isə uzun illərdir ki, hər birimizin bayram planlarının ayrılmaz hissəsidir.
Banco.az bu il də ənənəsinə sadiq qalaraq sizin üçün həm yeni, həm də köhnə Milad filmlərini bir yerə cəmləşdirib. İsti içkilərinizi götürün, başlayaq.
1. Operation Christmas Drop
Buraxılış ili: 2020
Ölkə: ABŞ
Məqalənin başlanğıc filmi bizi soyuq qış günlərində isti diyarlara aparır. Rejissor Martin Vudun ərsəyə gətirdiyi film ABŞ Hərbi Hava Qüvvələrinin real həyatda həyata keçirdiyi eyni adlı humanitar missiyadan ilhamlanaraq çəkilmişdir.
Vaşinqtonda konqres köməkçisi işləyən Erikaya Milad ərəfəsi ABŞ Hərbi Hava Qüvvələri bazasını araşdırmaq tapşırılır. Məqsəd isə bazanın bağlanması üçün əsas tapmaqdır. Çıxdığı səfərdə Erikanın yolu kapitan Endryu ilə kəsişir. Endryunun onu bazanın fəaliyyətinin davam etməsinin vacibliyinə inandırmağa cəmi iki günü var.
2. Deck the Halls
Buraxılış ili: 2006
Ölkə: ABŞ
İkinci film üçün bir qədər keçmişə, 2000-ci illərin əvvəllərinə yollanırıq. 2006-cı ildə komediya janrında çəkilmiş "Deck the Halls" filmi baş rollarda Denni DeVito və Metyu Broderiki görüşdürüb.
ABŞ-ın Massaçusets ştatının uydurma Klovdeyl qəsəbəsində yaşayan optometrist və Milad həvəskarı Stiv Finç ailəsi ilə birlikdə ənənəvi Milad bayramı keçirməyi planlaşdırır. Lakin yeni qonşusu Badi Hallın evi kosmosdan görünəcək qədər işıqlarla bəzəmək istəyi Stivin planlarını pozur. İki qonşu arasında başlayan rəqabət olduqca gülməli hadisələrə səbəb olur.
3. Twas the Text Before Christmas
Buraxılış ili: 2006
Ölkə: ABŞ
Film səhvən göndərilən bir mesajın iki yad insanı birləşdirən hekayəsindən bəhs edir.
Nyu-Yorkda yaşayan Edi uşaqlıqdan bəri sahib olduğu vərdişləri dəyişməyi sevməyən, fərqli təcrübələrə qapalı bir insandır. İllərdir eyni xəstəxanada işləyən qəhrəmanımız həm peşəkar, həm də şəxsi həyatında cəsarətli addımlar atmalıdır. Dəyişməyə cəsarət axtaran Ediyə təsadüfən "Nana" adlı yaşlı bir qadından ismarış gəlir. Bu təsadüfi ismarış hər iki qadının həyatına Milad bayramının sehirli toxunuşu ilə rəng qatacaq.
4. Our Little Secret
Buraxılış ili: 2024
Ölkə: ABŞ
Siyahının dördüncü filmi yeni həyatlarında keçmişin izləri ilə qarşılaşan iki insanı təqdim edir. Öz yeni partnyorlarının bacı-qardaş olduğunu öyrənən keçmiş sevgililər Milad bayramını eyni dam altında keçirməli olurlar. Keçmiş münasibətlərini gizli saxlamağa qərar verən Averi və Loqan hadisələrin gedişinə təsir edə biləcəklərmi?
5. Meet Me Next Christmas
Buraxılış ili: 2024
Ölkə: ABŞ
Nyu-Yorkun Milad sehri və filmin romantik dünyası tamaşaçıları ovsunlamaqda olduqda iddialıdır. "Meet Me Next Christmas" Layla adlı bir qadının Nyu-York şəhərində keçirilən və biletləri tükənmiş Pentatonix Milad konsertinə bilet tapmaq üçün keçdiyi macəraları və bu müddətdə yaşadığı romantik hadisələri əks etdirir. Filmdə məşhur akapella qrupu “Pentatonix” də öz musiqiləri ilə iştirak edir ki, bu da musiqi sevərlərin marağını çəkə bilər.
6. The Snow Sister
Buraxılış ili: 2024
Ölkə: Norveç
Maja Lunde və Lisa Aisato tərəfindən yazılmış eyni adlı uşaq kitabının motivləri əsasında ərsəyə gəlmiş bu film Milad möcüzəsi üçün ideal atmosfer vəd edən Norveçin kənd yerlərində çəkilib.
Film bacısının vəfatından sonra bayram sevincini itirən ailəsi ilə birlikdə dərin kədərə məruz qalan 11 yaşlı Culianın hekayəsindən bəhs edir. Günlərin bir günü Culianın yolu Miladı çox sevən Hedviqlə kəsişir. Maraqlıdır ki, uşaqların arasında yaranan dostluq Culianı yenidən Milad möcüzələrinə inandıra biləcəkmi?
7. Christmas on Windmill Way
Buraxılış ili: 2023
Ölkə: Kanada və ABŞ
Yeddinci filmimiz Kanadanın Ontario əyalətində yerləşən Nort-bey şəhərində çəkilib. Buranın mənzərəli təbiəti və kiçik şəhər atmosferi filmin bayram ruhunu əks etdirmək üçün ideal fon təmin edir.
Qəhrəmanımız Miya Meyer nənəsinin ənənəvi Milad kulinariya müsabiqəsində qalib gələcəyindən əmindir. Halbuki yaşlı qadının Miyadan gizlətdiyi xoşagəlməz bir sirr var. Hadisələrin gedişində yenidən peyda olan gənc qızın keçmiş sevgilisi bayram ərəfəsini daha da çətinləşdirə bilər.
8. Serendipity
Buraxılış ili: 2001
Ölkə: ABŞ
Yenidən yollanırıq 2000-ci illərin əvvəllərinə. Piter Çelsom tərəfindən 2001-ci ildə çəkilmiş film təsadüfi bir görüşdən sonra bir-birilərini itirən və illər sonra yenidən bir araya gəlməyə çalışan iki insanın hekayəsindən bəhs edir.
Nəzərinizə çatdıraq ki, "Serendipity" sözü ingilis dilində "xoşbəxt təsadüf" və ya "gözlənilməz, lakin xoş nəticə" mənasını verir. Bu termin, axtarılmayan və ya planlaşdırılmayan halda, təsadüfən dəyərli və ya maraqlı bir şeyin kəşf edilməsini ifadə edir.
9. Catering Christmas
Buraxılış ili: 2022
Ölkə: ABŞ
Gənc katerinq ustası Molli Frost məşhur Harrison Fondunun illik Milad Qalası üçün perfeksionist Cin Harrison tərəfindən işə götürülür. Lakin vəziyyət Mollinin Cinin fonda rəhbərlik etmək niyyəti olmayan fotoqraf bacısı oğlu Karsona aşiq olması ilə daha da çətinləşir.
10. That Christmas
Buraxılış ili: 2024
Ölkə: Birləşmiş Krallıq
Siyahını şübhəsiz ki, animasiya filmi olmadan yekunlaşdıra bilməzdik. 19 oktyabr 2024-cü ildə BFI London Film Festivalında təqdim olunmuş film rejissor Simon Ottonun debüt işidir və senarisi Riçard Kurtis və Piter Souter tərəfindən yazılmışdır. Süjet Kurtisin "That Christmas and Other Stories" adlı qısa hekayələr toplusuna əsaslanır və Wellington-on-Sea şəhərində yaşayan insanların bir-biri ilə əlaqəli hekayələrini izləyir.
Siyahını tamamlayarkən hər birinizə xoş seyirlər diləyir və arzu edirik ki, Milad möcüzəsi həyatımıza sehrli anlar və unudulmaz xatirələr gətirsin.
Bizi sosial şəbəkələrdən izləyin!!
