Müəllif:Mehin Qasımova,Banco.az

Meksikanın Verakruz əyalətində plastik tullantıların yanacağa çevrilməsi üzrə diqqətçəkən layihə həyata keçirilir.

Banco.az xəbər verir ki, Boka del Rioda pilot müəssisə işlədən Petgas şirkəti təkrar emalı çətin olan plastikləri emal edərək benzin, dizel və kerosinə bənzər yanacaq istehsal edir.

Müəssisə hazırda həftədə təxminən 1,5 ton plastik tullantıdan 1350 litr yanacaq əldə edir. İstehsal olunan yanacaq hələlik kommersiya məqsədilə satılmır. Şirkət onu yerli yanğınsöndürmə briqadalarına və ərzaq paylama xidmətlərinə pulsuz təqdim edir. Petgas gələcəkdə istehsal gücünü artırmağı planlaşdırır.

Plastikin yanacağa çevrilməsi prosesinin əsasını piroliz texnologiyası təşkil edir. Bu üsulda plastik tullantılar əvvəlcə xırda hissələrə parçalanır, daha sonra oksigensiz qapalı sistemdə yüksək temperatura məruz qoyulur. Oksigen olmadığı üçün plastik yanmır, əvəzində istiliyin təsiri ilə kimyəvi olaraq parçalanır.

Proses zamanı yaranan qazlar soyudulduqda maye karbohidrogen qarışığı əldə edilir. Bu maye daha sonra emal edilərək müxtəlif yanacaq növlərinə ayrılır. Texnologiyanın əsas üstünlüklərindən biri mexaniki təkrar emal müəssisələrinin qəbul etməkdə çətinlik çəkdiyi qarışıq və çirklənmiş plastiklərin də emalına imkan verməsidir.