Sabah 2018-ci il dünya çempionatında ölkə saatı ilə 19:00-da Fransa və Xorvatiya milliləri qarşı-qarşıya gələcək, təbii ki final öncəsi ən çox insanların diqqətinin üzərində olduğu futbolçulardan biri də Kylian Mbappé olacaq. Bu gün Banco.az komandası olaraq 19 yaşlı Mbappeni sizlərə tanış etmək istədik.
Mbappe 1998-ci il dekabrın 20-si Fransanın dünya çempionatını əldə etdiyi gündən 6 ay sonra State de Francedən 11 km uzaqda yerləşən Bondy-də, Fransanın şimal-şərqində Kamerunlu və eyni zamanda başqa məşqçı olan Wilfried və həndbol oyunçusu olan Fayzanın ailəsində dünyaya göz açıb.
Altı yaşında Fransızların rəğbətini qazanmışdı, Fransa Futbol Federasiyasına görə o Fransanın ən yaxşısı olacaqdı. Bunda atasının əməyi çox idi. Çünki atası baş məşqçi olduğundan altı yaşına qədər oğlu ilə daima məşğul olmuşdu, Wilfriedin kökü Kamerun və Nigeriya qarışığı idi, amma daha yaxşı həyat üçün Fransaya qaçmışdı. O çox bacarıqlı biri idi, lakin Afrikadakı həyat onun istədiyi kimi olmasına imkan vermirdi. Ona görə də Fransada Əlcəzair-Fransız qarışığı qadın Fayza ilə ailə həyatı qurmuşdu.
Ailəsində idman ənənəsi mövcud olduğundan, Mbappe şəhərin öz klubu və atasının məşqçi olduğu Bondydə futbola başlayır, 11 yaşında Chelsea klubunun seçim turlarına qatılır və 10 nömrə ilə çıxış edir. Burada Didier Drogba və Florent Malouda ilə də tanış olur. Lakin Mbappe nə qədər çalışsa da , Chelsea klubu onun yetərli olmadığını düşünürdü.
13 yaşında , məşhur Fransa Futbol akademiyası Clairefontaine-ə daxil olur. Hansı ki, Thierry Henry, Nicolas Anelksa, Hatem Ben Arfa kimi ulduzlar yetişdirən futbol akademiyası. Əslində Mbappe orda özünü çox yaxşı göstərmişdi, lakin bu təkcə futbol bacarığına görə deyildi. Mbappe futbol oynayanda çox danışırdı, meydançada hər kəsə nəsə deyərdi, komandanı meydançada çox yaxşı idarə edə bilirdi. Hələ deyilənə görə, o dövrlər məşhur futbolçuların müsahibələrini dinləyib onlar kimi danışmağa çalışarmış.14 yaşına qədər Clairefontainedə oynamağa davam edir.
Bondynin 13 yaş aşağı klubunun baş məşqçisi Riccardi deyirdi ki, "Mbappe Kristiano Ronaldonun ən böyük fanatıdır. Sizə deməyib amma, yataq otağında Ronaldonun posteri mövcuddur. Düzdü, o çox futbolçunun fanatıdır, amma uşaqlıq qəhrəmanı Ronaldodur."
Real Madrid, Bayern Münih, Arsenal və Paris Saint-Germain kimi klublar ona tamah salmışdı. 14 yaşında Zinedine Zidane ona Realda oynamağı təklif edir. Lakin ailəsi Mbappenin o qiymətə Real Madridə getməsinə razı olmur, çünki oğulları hələ gənc idi , ilk öncə davamlı oynaya biləcəyi bir klubda oynamalı idi. Maraqlı məqam ondadır ki, Mbappeyə Parisdən də təklif var idi. Amma ailəsi onun şəhərin mərkəzindən, yəni xəta və bəladan uzaq olmasını istəyirdi. Hətta mənbələrə görə Mbappenin meneceri olmaq üçün ailəsinə təklif göndərən yüzlərlə insan olub amma ailəsi hər birinin təklifini geri çevirərək güvənilən bir hüquq şirkəti ilə müqavilə imzalayırlar.
2015-ci ilin 2 dekabrında Monacoda ilk debütünü edir və Caen qarşısında 88-ci dəqiqədə Fabio Coentraonun yerinə oyuna daxil olan 16 yaş 347 günlük Mbappe Fransanın 17 yaşında ən gənc oyunçusu ünvanını əldə edən Thierry Henrynin rekordunu 21 il sonra qırmağı bacarır. 2016-cı ilin 20 fevralında Troyesə qarşı 3-1 qazandıqları oyunda uzatma dəqiqələrində qol ataraq Thierry Henrynin bir rekordunu da əlindən aldı. Bundan sonra isə 2019-cu ilə qədər Monaco ilə müqavilə imzaladı.
Alt liqaya düşdükdən sonra bir təhər özünə gələn Monaco 4 il sonra çempion oldu , Mbappe isə 29 liqa matçında 15 qol atmışdı. Çempionlar liqasında yarı finala qədər yüksələn Monaconun uğurlarında təbii ki ən yüksək pay sahibi 9 matçda 6 qol atan Mbappe idi.
Monaco Mbappeni itirməmək üçün çox mübarizə apardı, daha 18 yaşı olmamış transfer dövrünün diqqətləri üzərində olan ən gənc oyunçusu idi. Monaconun əzəli rəqibi PSG isə Mbappe üçün nə lazımsa ödəməyə hazır idi, 180 milyon avronu belə. Bəli, 2017-ci ilin avqustunda , PSG Mbappe üçün Monacoya 180 mln avro ödəyərək, heyətinə qatdı. Və Mbappe Neymardan sonra PSG-nin ən bahalı transferi oldu.
Mbappe açıqlama verib ki, Dünya çempionatında qazanacağı 17 min poundluq mükafatı uşaqlara maddi yardım edən xeyriyyə qurumuna bağışlayacaq. O müsahibəsində qeyd edib ki, milli komanda pul qazanmaq üçün yer deyil. Ümid edirəm bu fikir, bizim millimizin oyunçularının qulağında heç olmasa sırğa olar.
Xəzər Aslanov. Banco.az
