Müəllif:Mehin Qasımova,Banco.az
ABŞ-ın texnologiya şirkəti "Nvidia" süni intellekt infrastrukturunun inkişafını sürətləndirmək məqsədilə 500 milyard dollardan çox üçüncü tərəf kapitalının səfərbər edilməsi üçün altı böyük maliyyə qurumu ilə strateji tərəfdaşlıq qurub.
Şirkətin açıqlamasına görə, "Nvidia" müstəqil İT maliyyələşdirmə platformalarının yaradılması üçün "Apollo", "Blackstone", "BlackRock", "Brookfield", "Goldman Sachs" və "KKR" ilə anlaşma memorandumları imzalayıb.
Yaradılacaq maliyyələşdirmə platformalarının əsas məqsədi Nvidia-nın hesablama və süni intellekt infrastrukturunu qlobal investorlar üçün investisiya edilə bilən yeni aktiv sinfinə çevirmək və şirkətlərin süni intellekt fabriklərinə çıxışını genişləndirməkdir.
Müqavilələr çərçivəsində "Nvidia" tərəfdaşları ilə birlikdə müştərilər üçün daha sərfəli şərtlərlə və böyük miqyasda özəl kapital hovuzları formalaşdırmağı planlaşdırır. Şirkət bildirir ki, 500 milyard dollardan çox kapitalın səfərbər edilməsi yekun müqavilələrin imzalanmasından asılı olacaq.
Nvidia-nın təsisçisi və baş direktoru Jensen Huang bildirib ki, şirkət çip istehsalından başlayaraq bu gün məhsuldar və investisiya edilə bilən yeni infrastruktur sinfinin — süni intellekt fabriklərinin yaradılmasına qədər gəlib çatıb.
Huangın sözlərinə görə, süni intellekt sahəsində hesablama gücü birbaşa gəlir imkanları ilə əlaqəlidir. O qeyd edib ki, yeni maliyyələşdirmə platformaları müştərilərə məhdud hesablama resurslarına geniş miqyasda çıxış əldə etməyə və süni intellekt dövründə müxtəlif sektor və ölkələri dəstəkləyəcək infrastruktur qurmağa imkan verəcək.
Bu təşəbbüs Nvidia-nın yalnız çip istehsalçısı kimi deyil, qlobal süni intellekt infrastrukturunun maliyyələşdirilməsi və qurulmasında əsas iştirakçılardan biri kimi mövqeyini gücləndirmək strategiyasının göstəricisi kimi qiymətləndirilir.
