2018-ci ilin noyabr ayında Bakının avtomobil bazarında orta qiymət 42,152 min manat təşkil edib. Bu barədə “MBA Group” konsaltinq şirkətinin baş direktoru Nüsrət İbrahimov məlumat verib.
Onun sözlərinə görə, əvvəlki ayla müqayisədə avtomobil bazarında orta qiymət 12,22% bahalaşıb.
Ekspert qeyd edib ki, bu ilin noyabr ayında cəmi 1,729 min avtomobil satışa çıxarılıb.
“Oktyabr ayı ilə müqayisədə avtomobil bazarında təkliflər portfeli 2,26% azalıb. Satışa çıxarılan avtomobillərin böyük hissəsi, yəni 87,39%-i benzin mühərrikli avtomobillər olub. Dizel mühərrikli avtomobillər portfelin 12,61%-ni təşkil edib. Avtomat sürət qutusu ilə olan avtomobillərin payı 75,77%, mexaniki sürət qutusu olan avtomobillərin payı isə 24,23% təşkil edib”, - N.İbrahimov bildirib.
Onun sözlərinə görə, noyabr ayında bazardakı avtomobillərin orta yürüş göstəricisi təxminən 150,39 min kilometr (azalma 13,61%) təşkil edib. Avtomobillərin orta yaşı 11,61 il olub ki, bu da cari ilin oktyabr ayının göstəricisi ilə müqayisədə 0,05% çoxdur.
Ekspert əlavə edib ki, bazarda təklif olunan avtomobillərin orta illik köhnəlmə dərəcəsi 7,48% təşkil edib.
“Eyni zamanda, yaşı 5 ilədək olan avtomobillərdə bu göstərici 8,95%, 5 ildən 10 ilədək olan avtomobillərdə 8,39%, 10 ildən 15 ilədək olan avtomobillərdə 7,29%, 15 ildən 20 ilədək olan avtomobillərdə 4,01%, 20 ildən 25 ilədək olan avtomobillərdə isə 3,69% təşkil edib”, - N.İbrahimov bildirib.
© İnterfaks-Azərbaycan
