Müəllif: Tamara Mustafayeva, Banco.az
III rübün nəticələrinin açıqlanmasının ardınca “Netflix”in səhmləri kəskin dəyər qazanıb.
Banco.az xəbər verir ki, qlobal internet televiziyası “Netflix”in abunəçilərinin sayı ilin üçüncü rübündə 8,8 milyon nəfər artıb.
Bununla da, şirkətin dünya üzrə abunəçilərinin sayı illik 10,8 faiz artaraq 247,2 milyon nəfərə çatıb.
“Netflix”in ilin üçüncü rübündəki gəliri ötən ilin eyni dövrü ilə müqayisədə 7,8 faiz artaraq 8,54 milyard dollara yüksəlib. Şirkətin gəliri ötən ilin eyni dövründə 7,9 milyard dollar olaraq qeyd edilmişdi.
“Netflix”in xalis mənfəəti isə üçüncü rübdə ötən ilin eyni dövrü ilə müqayisədə 20 faiz artaraq 1,68 milyard dollara çatıb. Ötən ilin üçüncü rübündə şirkətin xalis mənfəəti 1,4 milyard dollar olub.
Qeyd edək ki, “Netflix” üçüncü rüblük mənfəətini elan etdikdən sonra şirkətin səhmləri Nyu-York birjasında Bakı vaxtılə səhər saat 10:38-də 14,45 faiz dəyər qazanaraq 396,22 dollara çatıb ki, bu, 2021-ci ilin yanvarından bəri qeydə alınan ən böyük artımdır.
Bizi sosial şəbəkələrdən izləyin!!
