Muzdlu işçilərin sosial sığorta ödənişlərinin hesablanması | Banco.az

Muzdlu işçilərin sosial sığorta ödənişlərinin hesablanması

Azərbaycanda sahibkarlıq mühitinin yaxşılaşması və startaplara verilən vergi güzəştləri kiçik biznesə başlamaq istəyənlərin işini rahatlaşdırıb. Yeni biznesə başlayan iş adamları vergi öhdəliklərini dəqiqləşdirmək üçün məsləhətləşmələrə üstünlük verirlər. Bu zaman suallarına konkret cavablar ala bilirlər. Vətəndaşların ən çox ünvanladığı sorğular əməkhaqqından gəlir vergisinin tutulması və sosial sığorta haqlarının hesablanması qaydaları ilə bağlıdır. 

Vergilər Nazirliyinin açıqlamasında bildirilib ki, 1 yanvar 2019-cu il tarixdən Vergi Məcəlləsində edilmiş dəyişikliyə əsasən, neft-qaz sahəsində fəaliyyəti olmayan və qeyri-dövlət sektoruna aid edilən vergi ödəyicilərində işləyən fiziki şəxslərin muzdlu işdən aylıq gəlirləri 8.000 manatadək olduqda verginin dərəcəsi 0 (sıfır) faiz təşkil edir. Bu halda göstərilən əməkhaqqı məbləğindən gəlir vergisi tutulmur. Həmin fiziki şəxsin sosial sığorta haqqına cəlb edilən aylıq gəliri 200 manatdan çox olduqda 6 manat + 200 manatdan çox hissənin 10 faizi miqdarında sosial sığorta haqqı tutulur.

Məsələn, 6 + 300 * 10% = 36.

İşəgötürən isə sığorta haqqına cəlb edilən aylıq gəlirin 200 manatadək olan hissəsindən 22 faiz, 200 manatdan yuxarı olan hissəsindən 15 faiz dərəcə ilə sosial sığorta haqqı hesablayaraq ödəməlidir.

Ən sərfəli kredit üçün müraciət et

Həmçinin qeyd edilib ki, neft-qaz sahəsində və ya dövlət sektoruna aid edilən vergi ödəyicilərində işlədiyiniz halda Vergi Məcəlləsinin 1 yanvar 2019-cu il tarixdən qüvvəyə minmiş müddəalarına əsasən fiziki şəxsin əsas iş yerində (əmək kitabçasının olduğu yerdə) hər hansı muzdlu işlə əlaqədar əldə edilən aylıq gəliri 2.500 manatadək olduqda həmin məbləğin 200 manatadək olan hissəsi gəlir vergisindən azaddır. Buna əsasən həmin şəxslərin aylıq əməkhaqqından 200 manat çıxılmaqla qalan fərqdən gəlir vergisi hesablanır ((500-200)*14%=42). Həmin fiziki şəxsin sosial sığorta haqqına cəlb edilən aylıq gəlirindən 3 faiz işçi, 22 faiz isə işəgötürən tərəfindən sosial sığorta haqqı ödənilir.

Qeyd olunan hesablamalarla bağlı qanunvericilikdə hər hansı dəyişiklik edilməmişdir.

Əlavə olaraq bildiririk ki, Vergilər Nazirliyinin rəsmi internet səhifəsində "Əməkhaqqından tutulmaların hesablanması kalkulyatoru" fəaliyyət göstərir.

Vergiler.az

Ən sərfəli krediti almaq üçün müraciət et

Bank işi kursları

Banco Academy

Qeydiyyatdan keç