Müəllif: Gülnar Əhmədli, Banco.az
Misirin dünyaca məşhur turizm mərkəzi Şarm əl-Şeyxdə həyata keçirilən Citystars Sharm El Sheikh layihəsi səhranın ortasında salınan nəhəng süni laqunu ilə diqqət çəkir.
Banco.az xəbər verir ki, təxminən 11,29 hektar ərazini əhatə edən və 24 futbol meydanı böyüklüyündə olan laqun səhranın ortasında ziyarətçilərə tropik çimərlik təcrübəsi təqdim edir.
Təxminən 740 metr uzunluğunda olan nəhəng laqunun tutumu 300 milyon litrdir. Layihədə bölgənin məhdud içməli su ehtiyatlarından istifadə edilməməsi üçün xüsusi üsul tətbiq olunur.
Laqunun doldurulması üçün yeraltı duzlu su akviferlərindən çıxarılan sudan istifadə edilir. Yüksək tutumlu sənaye nasosları ilə həyata keçirilən prosesin tamamlanması 22 gün çəkir.
Suyun təmiz və şəffaf saxlanılması üçün ağıllı sensorlardan istifadə olunur. Sistem suyun keyfiyyətini davamlı izləyir, təmizləmə mexanizmi isə yalnız ehtiyac olan məqamlarda işə düşür. Bu yolla su və enerji sərfiyyatının azaldılması hədəflənir.
Çilidə yerləşən Crystal Lagoons şirkətinin texnologiyası ilə yaradılan laqunda ənənəvi sistemlərlə müqayisədə daha az kimyəvi maddədən istifadə edildiyi bildirilir.
Ağ qumlarla əhatə olunan laqun yalnız görüntü məqsədi daşımır. Ziyarətçilər burada üzmək, istirahət etmək və müxtəlif su idmanları ilə məşğul olmaq imkanına malikdirlər.
Nəhəng kompleksin ətrafında otellər, yaşayış binaları, marinalar, alış-veriş məkanları və qolf meydançaları yerləşir. Dünyanın ən böyük süni kristal laqunlarından biri hesab olunan bu layihə səhranın ortasındakı qeyri-adi görünüşü ilə Şarm əl-Şeyxin diqqətçəkən turizm layihələrindən birinə çevrilib.
Bizi sosial şəbəkələrdən izləyin!!
