Müəllif: Tamara Mustafayeva, Banco.az
Dünya Meteorologiya Təşkilatı (WMO) milyonlarla insanın iqtisadi dəyərlərə və həyati infrastruktur obyektlərinə getdikcə daha çox zərər vuran təhlükəli hava şəraitinə qarşı qorunmadan məhrum olduğunu bildirib.
Banco.az xəbər verir ki, WMO-nun 75 illik yubileyini qeyd etmək və təhlükəli hava hadisələrinə qarşı həyat qurtaran tədbirlərin görülməsini təşviq etmək məqsədilə keçirilən, “Hər Kəs Üçün Erkən Xəbərdarlıqlar” təşəbbüsünə həsr olunmuş Fövqəladə Sessiya Cenevrədə başlayıb.
İclas ilə bağlı yayımlanan hesabatda qeyd olunur ki, son on ildə “Hər Kəs Üçün Erkən Xəbərdarlıqlar” xidmətlərinə malik ölkələrin sayı iki dəfədən çox artsa da, hələ də ciddi çatışmazlıqlar qalmaqdadır.
Hesabatda vurğulanır:
“Milyonlarla insan iqtisadi dəyərlərə və həyati infrastruktur obyektlərinə getdikcə daha çox zərər vuran təhlükəli hava şəraitinə qarşı qorunmadan məhrumdur.”
Bildirilib ki, BMT-nin Baş katibi Antonio Quterreş tərəfindən 2022-ci ildə başladılan və 2027-ci ilin sonuna qədər qlobal səviyyədə universal əhatə təmin etməyi hədəfləyən “Hər Kəs Üçün Erkən Xəbərdarlıqlar” təşəbbüsünü sürətləndirmək və genişləndirmək məqsədilə WMO-nun 193 üzvü Fövqəladə Sessiyanı başlatmışdır.
Bizi sosial şəbəkələrdən izləyin!!
