Azərbaycan Respublikası Mərkəzi Bankı “Maliyyə xidmətlərinin inkişafına dair Strateji Yol Xəritəsi”nin “Maliyyə bazarı iştirakçılarının bilik və bacarıqlarının artırılması” adlı hədəfinin icrası ilə əlaqədar 2018/2019-cu tədris ilinin birinci yarımilliyində Bakı şəhərində yerləşən bir sıra dövlət və özəl məktəbəqədər təhsil müəssisələrində uşaqların və müəllim heyətinin maliyyə savadlılığının artırılması üçün məşğələlər keçirmişdir. Ümumilikdə, 270 nəfəri əhatə edən məşğələlər zamanı uşaqlara maliyyə savadlılığının ümumi anlayışları – yığım, qənaət və pul haqqında ilkin fikirlər aşılanmış, milli pul nişanlarımız haqqında məlumatlanma təmin olunmuşdır. Müəllim heyətinə bu mövzuların gələcəkdə tədrisi ilə bağlı məsləhətlər verilmiş, müəllim və uşaqların istifadəsi üçün öyrədici materiallar paylanılmışdır.
Eyni dövrdə ümumtəhsil müəssisələrinin 300 şagirdi üçün də maarifləndirici dərslər təşkil edilmiş və bu dərslər zamanı məktəblilərə pul və pul münasibətləri, qənaət və israf, yığım, şəxsi büdcə haqqında təqdimatlar keçirilmiş və Maliyyə savadlılığı portalından (bizimpullar.az) müxtəlif videoçarxlar nümayiş etdirilmişdir. Müəllimlərə portaldan tədris prosesində effektiv istifadə ilə bağlı tövsiyələr verilmiş və şagirdlərin biliklərinin möhkəmləndirilməsi məqsədilə öyrədici materiallar paylanılmışdır.
Qeyd edək ki, məktəbəqədər və ümumtəhsil müəssisələrinin şagird və müəllim heyəti iqtisadi maarifləndirmə tədbirlərində əsas hədəf qruplarından biridir və onlara istiqamətlənmiş tədbirlər gələcəkdə də təşkil ediləcəkdir.
