Azərbaycan Mərkəzi Bankından "Banco.az"a daxil olan məlumata əsasən, 9 iyun 2016-cı il tarixində “Maliyyə savadlılığı” layihəsi çərçivəsində həyata keçirilən “Maliyyə savadlılığı: Peşəkar karyeraya aparan yol” adlı müsabiqə xarakterli təlimdə uğur qazanmış tələbələrin sertifikatlarla təltif olunması mərasimi olmuşdur.
Qeyd edək ki, tədbir çərçivəsində ali təhsil müəssisələrinin III və IV kursunda təhsil alan 214 tələbəyə bank-maliyyə sisteminin fəaliyyətinə dair maarifləndirici seminar keçirilmişdir.
Seminar iki mərhələdən ibarət olmaqla təşkil edilmişdir. Birinci mərhələdə iştirakçılara Maliyyə Savadlılığı layihəsi haqqında məlumat verilmiş, eləcə də Mərkəzi Bank üçün arzuolunan namizədlər və maliyyə bazarları mövzularında təqdimatlar aparılmışdır. Bu mərhələni uğurla başa vuran 113 nəfər tələbə növbəti – ikinci turda iştirak hüququ əldə etmişlər. İkinci turda iştirakçı tələbələrə “İstehlakçı büdcəsinin idarə olunması, nağdsız ödənişlər və əmanətlərin sığortalanması”, “Nağd pul kreditləri və müddətli əmanətlər”, “Mikromaliyyənin önəmi və məsuliyyətli borclanma” və “Bank əməliyyatları” mövzularında təlim keçilmişdir.
İkinci mərhələnin sonunda ən yüksək nəticə göstərmiş 98 nəfər tələbədən hazırda 26-sı tərafdaş bank-maliyyə qurumlarında təcrübəçi olmaq imkanı qazanmışdır. 1 nəfər tələbə isə təcrübə proqramını uğurla başa vuraraq artıq işlə təmin olunmuşdur.
Təlimin əsas tərəfdaşları Əmanətlərin Sığortalanması Fondu, Yapı Kredi Bank Azərbaycan, Amrahbank, Bank of Baku, AGBank, Azərbaycan Sənaye Bankı, Ekspressbank, Bank BTB, Bank VTB Azərbaycan, Accessbank, DəmirBank, Unibank və “FINCA Azerbaijan” Qeyri-bank Kredit Təşkilatıdır.
Mərkəzi Bankın təşəbbüsü ilə Maliyyə savadlılığı layihəsi çərçivəsində təşkil edilən bu səpkili təlimlərin, eləcə də əhalinin maliyyə bilik və bacarıqlarının artırılmasına yönəlmiş müxtəlif tədbirlərin gələcəkdə də keçirilməsi nəzərdə tutulur.
