Beynəlxalq valyuta birjalarında bu həftə AMB və TCMB-nin açıqlamaları və ABŞ-ın əmək bazarı göstəriciləri diqqət mərkəzində olacaqdır.
EUR
Almaniyada pərakəndə satış dövriyyəsinin artması və Avrozonada inflyasiyanın yüksəlməsi, beynəlxalq valyuta birjalarında avronun keçən həftə ərzində 1.1419$-a kimi bahalaşmasına təsir etmişdir. Təhlillərə əsasən, hal-hazırda 1.14$ ətrafında korreksiya edən EUR/USD məzənnəsi, 1.1387$-ı yuxarı istiqamətdə qırarsa, 1.1450$-a kimi də bahalaşa bilər.
Bununla yanaşı, cümə axaşmı Bakı vaxtı ilə saat 17:30-da baş tutacaq Avropa Mərkəzi Bankının mətbuat konfransı da investorların diqqət mərkəzindədir. Bank sədrinin gələcək gözləntilərə dair verəcəyi açıqlamalar, maliyyə bazarlarında ticarət aktivliyini daha da artıracaqdır.
GBP
GBP/USD məzənnəsi son yarım ilin maksimum səviyyəsini yenilədikdən sonra korreksiya etməkdədir. Foreks bazarlarında 1.32$-ın üzərində ticarət edilən məzənnə, 1.3290$-ı da yuxarı istiqamətdə qırarsa, 1.3362 və 1.3472$-a kimi bahalaşa bilər.
Bununla yanaşı, cümə günü saat 17:30-da dərc ediləcək Amerikanın əmək bazarı ilə bağlı önəmli fundamental məlumatların, funtun qiymətində də güclü dalğalanmaya təsir edəcəyi gözlənilir.
TRY.
Türkiyə valyuta birjalarında isə dolların qiyməti bahalaşmaqda davam edir. USD/TRY məzənnəsi 5.38TL-ni yuxarı istiqamətdə qırarsa, bahalaşma proqnozları yenidən güclənməklə, 5.41 və 5.45TL-yə kimi də bahalaşa bilər.
Çərşənbə günü saat 15:00-da Türkiyə Mərkəzi Bankının yayımlayacağı faiz qərarı da investorlar tərəfindən böyük maraqla gözlənilməkdədir.
OIL.
Avropanın Brent markalı neftinin qiymətində güclü artım dalğasından sonra korreksiyasının şahidi oluruq. Ucuzlaşma 64$-a kimi davam edə bilər və məhdud qiymətləndirilir. Beləliklə, neft qiymətlərində yenidən yüksək qiymətlərin müşahidə edilə biləcəyi proqnozları güclü olaraq qalır.
Bu həftənin çərşənbə günü saat 19:30-da yayımlanacaq ABŞ-ın neft ehtiyatları ilə bağlı statistik məlumatların da qiymətə güclü təsir edəcəyi gözlənilir.
GOLD
Əlvan metallar bazarlarında qızıl qiymətləri keçən həftə ərzində 1290$-a (41.5 $/qram) kimi ucuzlaşıb. Lakin qızıl qiymətlərində də ucuzlaşma müvəqqəti qiymətləndirilir və yenidən bahalaşa biləcəyi proqnozlaşdırılır. Bunun üçün qiymətin yenidən 1300$-ın (41.8 $/qram) üzərində ticarət olunması önəmli rol oynaya və 1318$-a (42.4 $/qram) kimi dəyər qazanmasına səbəb ola bilər.
InvestAz
