Müəllif:Gülbəniz Hüseynli/Banco.az

LinkedIn, peşəkar əlaqələr qurmaq və şəxsi markanızı inkişaf etdirmək üçün vacib platformalardan biridir.

Amma profilinizi effektiv hala gətirmək üçün bir neçə əsas məqama diqqət yetirmək lazımdır.

Banco.az bu barədə maraqlı məlumatları təqdim edir:

İlk növbədə, peşəkar bir profil şəkli və diqqətçəkən fon şəkli seçərək təsirli ilk təəssürat yaradın. Profilinizin başlığında yalnız işinizin adını deyil, fəaliyyət sahənizdəki dəyərinizi də vurğulayın.

"Haqqında" bölməsində qısa və aydın şəkildə özünüzü təqdim edin, peşəkar təcrübənizi və nailiyyətlərinizi qeyd edin. İş təcrübəsi bölməsində keçmişdə hansı işlərdə çalışdığınızı sadəcə göstərməkdən daha çox, nailiyyətlərinizi rəqəmlərlə dəstəkləyərək konkretləşdirin. Təhsil və sertifikatlarınızı, xüsusilə də sahənizlə bağlı kursları əlavə etməyi unutmayın.

Profilinizdə əsas bacarıqlarınızı qeyd edin və həmkarlarınızdan bacarıqlarınızı təsdiqləmələrini və ya tövsiyələr yazmalarını xahiş edin. Əlavə olaraq, işinizlə bağlı layihələrə dair təqdimatlar və ya portfolionuzu əlavə edərək profilinizi zənginləşdirin. İxtisasınıza uyğun açar sözlərdən istifadə edin ki, profiliniz axtarışlarda daha asan tapılsın.

LinkedIn-də aktiv olmaq profilinizin daha çox insanın qarşısına çıxmasına şəraiti artırır. Faydalı məzmun paylaşmaq, müzakirələrə qoşulmaq və şəbəkənizi genişləndirmək bu platformadakı mövqeyinizi gücləndirəcək.

Profilinizi müntəzəm olaraq yeniləyin və yeni nailiyyətlərinizi əlavə edin. Bu, həm diqqət çəkməyinizə, həm də peşəkar sahədə daha geniş imkanlar əldə etməyinizə kömək edəcək.