Müəllif:Mehin Qasımova,Banco.az

Dünyanın ən böyük qızıl emalı və tranzit mərkəzlərindən biri olan İsveçrənin  qızıl ixracı yanvar ayında aylıq müqayisədə 8 faiz azalaraq 128,2 tona düşüb.

Banco.az xəbər verir ki, azalmaya səbəb Böyük Britaniyaya göndərilən qızılın 101 tondan 43 tona düşməsi, Türkiyəyə ixracın isə 9,3 tondan 5,6 tona düşməsi ilə əlaqədardır.

Bunun əksinə olaraq, Asiyada güclü artım müşahidə olunub. Yanvar ayında Çinə 23 ton qızıl ixrac edilib. Dekabr ayında Çinə heç bir göndəriş olmayıb. Hindistana göndərişlər də 2 tondan 23 tona qədər artıb.

Yanvar ayında ümumi qızıl ixracı 128,2 ton təşkil edib. Bu rəqəm dekabr ayında 139 ton, ötən ilin eyni dövründə isə 225,4 ton olub.

Ölkələr üzrə baxdıqda, Fransaya göndərilən məhsullar ümumilikdə 16,4 ton təşkil edib. Lakin ABŞ-a göndərilən məhsullar dekabr ayında 5,8 tondan 161 kiloqrama düşüb. Birləşmiş Ərəb Əmirlikləri, Səudiyyə Ərəbistanı və Honkonqa göndərilən məhsullar da artıb.