Müəllif: Mehin Qasımova, Banco.az

ABŞ sanksiyaları və müharibə təzyiqləri səbəbindən qlobal maliyyə sistemindən getdikcə daha çox təcrid olunan İran xarici ticarətdə kriptovalyutalardan istifadəyə imkanları genişləndirir.

Banco.az xəbər verir ki, Tehran bu addımla həm sanksiyaların yaratdığı maliyyə məhdudiyyətlərini azaltmağa, həm də xarici ticarətdə ənənəvi bank sistemindən və dollardan asılılığı aşağı salmağa çalışır.

İran Mərkəzi Bankı ölkəyə xarici valyuta gətirən ixracatçılar üçün mövcud qaydaları yumşaltmaqla yanaşı, Bitcoin və Tether (USDT) kimi kriptovalyutalardan sərhədlərarası əməliyyatlarda istifadəyə daha geniş imkan yaradır.

Əvvəllər İran ixracatçılarından əldə etdikləri xarici valyutanın əhəmiyyətli hissəsini ölkəyə qaytarmaları və dövlət tərəfindən müəyyənləşdirilən sistemlər vasitəsilə satmaları tələb olunurdu. Lakin ABŞ sanksiyalarının sərtləşdirilməsi, beynəlxalq bank kanallarına çıxışın məhdudlaşdırılması və müharibə şəraiti Tehranı alternativ maliyyə mexanizmlərinə yönəldib.

Yeni yanaşma İran şirkətlərinə beynəlxalq ödənişləri ənənəvi bank sistemindən kənar həyata keçirmək üçün əlavə imkan yaradır. Bu baxımdan kriptovalyutalar ölkə üçün yalnız investisiya aləti deyil, həm də xarici ticarətin davam etdirilməsi üçün alternativ ödəniş infrastrukturu rolunu oynamağa başlayır.

Tehranın bu siyasəti ABŞ-ın maliyyə sanksiyalarının təsirini azaltmaq və İranın qlobal ticarət əlaqələrini qorumaq səylərinin bir hissəsi kimi qiymətləndirilir. Eyni zamanda, kriptovalyutalardan istifadənin genişlənməsi İranın dollar əsaslı beynəlxalq maliyyə sistemindən asılılığını azaltmaq cəhdlərini gücləndirir.