Bakı Fond Birjasında (BFB) “Holcim (Azerbaijan)” ASC-nin (Qaradağ Sement Zavodu) səhmlərinin alqı-satqısı üzrə növbəti əqd bağlanılıb.

BFB-yə istinadən xəbər verilir ki, əqd müəssisənin 47 səhminin təkrar bazarda realizə edilməsini nəzərdə tutur. Qiymətli kağızlar 35 manatdan alınıb-satılıb.

Xatırladaq ki, BFB-də Azərbaycanın aparıcı sement istehsalçısının səhmləri ilə bağlı bundan əvvəlki sövdələşmələr mayın 2-də və aprelin 19-da baş tutub. Həmin vaxt “Holcim (Azerbaijan)”ın müvafiq olaraq 46 səhmi 35,5 manatdan və 93 səhmi 37 manatdan “əl dəyişdirib”.

Başqa sözlə, təxminən 2 ay ərzində müəssisənin səhmləri 2 manat və yaxud 5,4% ucuzlaşıb. Səhmdar cəmiyyətin 31 812 880 manatlıq nizamnamə kapitalının hər birinin nominal dəyəri nominal dəyəri 20 manat olan 1 590 644 səhm əsasında formalaşdığını nəzərə alsaq, sement istehsalçısının bazar dəyərinin 58 853 828 manatdan 55 672 540 manata düşdüyünü demək olar.

Xatırladaq ki, "Holcim (Azerbaijan)" 2000-ci ildə yaradılıb və ölkənin ən iri sement istehsalçısıdır. Şirkətin səhmlərinin 76%-i İsveçrənin “Lafarge Holcim” və "Holcim Auslandbeteiligungs GmbH.” şirkətlərinə (müvafiq olaraq 66% və 10%), 10%-i Avropa Yenidənqurma və İnkişaf Bankına (EBRD), 14%-i isə fiziki şəxslərə məxsusdur.

Qaradağ Sement Zavodu 2016-cı ili 27 mln. manat xalis zərərlə başa vurub. 

Mənbə: Report.az