Müəllif - Eldar Kərimov/Banco.az
Hindistan və ABŞ cümə axşamı ticarət sazişinin tezliklə bağlanması və tariflərlə bağlı mübahisələrin həlli üçün danışıqlara başlamağa razılaşıblar, – Reuters xəbər verir.
Yeni Dehli daha çox ABŞ nefti, qazı və hərbi texnikası alacağına və qeyri-leqal immiqrasiyaya qarşı mübarizə aparacağına söz verib.
Bu razılaşmalar ABŞ Prezidenti Donald Tramp və Hindistanın Baş naziri Narendra Modi arasında Ağ Evdə keçirilən danışıqlardan sonra əldə olunub. Tramp, görüşdən bir neçə saat əvvəl Hindistanda amerikalı biznesmenlər üçün mövcud ticarət şərtlərini tənqid edərək, ABŞ ixracına yüksək rüsumlar tətbiq edən ölkələrə qarşı cavab tariflərinin yol xəritəsini təqdim etmişdi.
"Baş nazir Modi Hindistanın ABŞ məhsullarına tətbiq etdiyi ədalətsiz, çox sərt tarifləri azaltdığını elan etdi. Bu, həqiqətən də böyük bir problemdir", – deyə Tramp bildirib.
Hindistanın Xarici İşlər Naziri Vikram Misri, ticarət məsələlərinin həlli ilə bağlı sazişin növbəti yeddi ay ərzində imzalanmasının mümkün olduğunu söyləyib.
Görüşdən sonra yayılan ortaq bəyanatda Vaşinqton, Yeni Dehlinin bəzi Amerika mallarına tarifləri azaltmaq və ABŞ kənd təsərrüfatı məhsulları üçün bazar çıxışını genişləndirmək addımlarını alqışladığını bildirib. Hər iki tərəf 2025-ci ilin payızına qədər ilkin ticarət sazişinin detalları üzərində işləməyə razılaşıb.
Misri əlavə edib ki, tariflər mövzusunda liderlərin fərqli baxışları olsa da, ən vacib məsələ onların problemi həll etmək üçün ortaq bir yol tapmasıdır.
Bəzi əldə olunan razılaşmalar olduqca iddialıdır: Hindistan ABŞ-dan milyardlarla dollar dəyərində müdafiə texnikası alacağını və Vaşinqtonu özünün əsas neft və qaz tədarükçüsü edə biləcəyini bəyan edib. Tramp isə Modi ilə birgə mətbuat konfransında bildirib ki, Hindistanın ABŞ-dan ticarət həcmini 2030-cu ilə qədər iki dəfə artırmaq niyyəti var.
