Müəllif: Tamara Mustafayeva, Banco.az
Banco.az bugünkü məqalədə yaşıl rəngin insanlara hansı psixoloji təsirlər ötürdüyünü təqdim edir.
Belə ki, əsasən təbiət, sağlamlıq, yaxşı şans və qısqanclıqla əlaqələndirilən bu rəng eyni zamanda pulu da xarakterizə edir.
Bir çox insanın ilk olaraq təbiətlə əlaqələndirdiyi yaşıl rəngin depressiyanı aradan qaldırmaqda təsirli olduğu düşünülür. Bundan başqa aparılan bir araşdırmaya görə, yaşıl rəngin üstünlük təşkil etdiyi mühitdə işləyən insanların daha az qarın ağrısı yaşadıqları aşkar edilmişdir. Gecə eynəklərində də ən çox yaşıl rəngdən istifadə edilir, çünki insan gözünün ən həssas olduğu rəng yaşıldır və insan gözü ən çox yaşılın tonlarını ayırd edir. Həmçinin yaşıl böyüməyi və inkişafı da xarakterizə edir.
Marketinq baxımından yanaşdıqda yaşıl rəng mağazalarda insanları rahatlatmaq üçün istifadə edilir. Zənginlik simvolu olan bu rəng həmçinin uzun zamandır ki, məhsuldarlığın da göstəricisidir.
İndi isə gəlin loqotiplərində məhz yaşıl rəngə üstünlük verən dünyaca məşhur şirkətlərdən bir neçəsi ilə tanış olaq.
Whole Foods
E-ticarət nəhəngi “Amazon”un ötən il 13.7 milyard dollar qarşılığında tərkibinə daxil etdiyi qida pərakəndəçisi “Whole Foods” insanların yaşıl ilə sağlamlığı əlaqələndirməsindən öz leyhinə istifadə etmək üçün yaşıl rəngdə bir loqodan istifadə edir.
Animal Planet
“Discovery Channel”ın da sahibi olan “Discovery Communications” şirkətinə bağlı bir sənədli film kanalı olan “Animal Planet” sözsüz ki, yaşıl rəngin təbiəti xarakterizə etməsindən ötrü bu rəngdən öz loqosunda istifadə edir.
BP
Britaniyanın çoxmillətli enerji və qaz şirkəti olan “BP” fəaliyyət göstərdiyi sahənin ətraf mühitə dost olmamasını bir az da olsa lehinə çevirmək və ətraf mühitin qayğısına qalan bir marka olması təsirini yaratmaq üçün loqosunda yaşıl rəngdən istifadə edir.
Starbucks
Hərhalda bu siyahıda dünyanın ən böyük qəhvəxana şəbəkəsi olan “Starbucks”a yer verməmək olmazdı. Üzərində dəniz qızı təsviri olan loqosu ilə tanınan marka bu rəngin diqqət çəkici olması ilə yanaşı, ətraf mühit və sağlamlıqla əlaqəli olmasından da faydalanır.
Demək olar ki hər birimizin gündəlik həyatının bir parçasına çevrilmiş mesajlaşma mübadilə sistemi olan "WhatsApp" da yaşıl rəngin özünə xas xüsusiyyətlərinin gücündən yararlanır.
Bizi sosial şəbəkələrdən izləyin!!
