Bankların təklif etdiyi ənənəvi xidmətlərdən biri də hesablaşma-kassa əməliyyatlarının həyata keçirilməsi üçün cari hesabların açılması kimi fəaliyyətlərdir. Cari hesablardan adətən istər ölkədaxili, istərsə də beynəlxalq pul köçürmələri zamanı istifadə olunur. Depozit hesablarından fərqli olaraq müddətsiz olur və məbləğin üzərinə faiz hesablanmır. Cari hesablar milli valyuta ilə yanaşı, bir sıra digər xarici valyutalarda da açıla bilər. Cari hesabların açılması üçün əksər hallarda rezidentlər üçün şəxsiyyət vəsiqəsi kifayət edir. Bank mütəxəssislərinin tez-tez rastlaşdığı hallardan biri də müştərilərin sürücülük və digər xidməti vəsiqələri şəxsiyyəti təsdiq edən sənəd kimi təqdim etmələridir. Halbuki, banklar tərəfindən rezidentlər üçün şəxsiyyəti təsdiq edən sənəd kimi şəxsiyyət vəsiqəsi, qeyri-rezidentlər üçün isə xarici pasport (ümumvətəndaş pasportları) və miqrasiya orqanları tərəfindən verilmiş müvəqqəti şəxsiyyət vəsiqəsi tələb oluna bilər.
Şəxsiyyət vəsiqəsi ilə banka müraciət edən şəxs ərizə yazır və mütəxəssisin köməyliyi ilə imza nümunəsini doldurur. Azərbaycanda hesabların açılması üzrə komissyonlar bankdan banka fərqlənir, belə ki, bəzi banklar bu xidməti pulsuz göstərdikləri halda digərlərində pullu xidmət növü hesab edilir.
Əksər hallarda səfirlik və miqrasiya qurumları tərəfindən müştərilərdən hesablarında nə qədər pulun olmasına dair sənəd gətirmələri tələb olunur. Bu zaman onlar banklara müraciət edərək arayış tələb edə bilərlər. Arayışlar, Azərbaycan dili ilə yanaşı, bir sıra xarici dillərdə - rus, türk, ingilis dillərində verilə bilər.
|
Bankın adı |
Hesab açma haqqı | Arayış üçün komissyon |
| AccessBank | pulsuz | pulsuz |
| Bank of Baku | pulsuz | pulsuz |
| Muğanbank | pulsuz | pulsuz |
| NBC Bank | pulsuz | pulsuz |
| Zamin Bank | pulsuz | pulsuz |
| AFB Bank | pulsuz | pulsuz |
| Amrahbank | pulsuz | 2 manat |
| Deka Bank | pulsuz | 2 manat |
| Kredo Bank | pulsuz | 2 manat |
| Turanbank | pulsuz | 2 manat |
| Unibank | pulsuz | 5 manat |
| Expressbank | pulsuz | 2 manat1 |
| BTB Bank | pulsuz | 3 manat |
| Xalq Bank | pulsuz | 3 manat |
| Nikoil Bank | pulsuz | 3 manat2 |
| ASB Bank | pulsuz | 5 manat |
| Atabank | pulsuz | 5 manat |
| Atrabank | pulsuz | 5 manat |
| Bank Avrasiya | pulsuz | 5 manat |
| DəmirBank | pulsuz | 5 manat |
| Bank Respublika | pulsuz | 10 manat |
| Bank Silk Way | pulsuz | 10 manat |
| Günay Bank | pulsuz | 10 manat |
| AGBank | pulsuz | 0.5% (min 10 manat) |
| Bank VTB Azərbaycan | pulsuz | 11.8 manat (18% ƏDV)3 |
| Parabank | pulsuz | 20 manat |
| Kapital Bank | 10 manat | pulsuz |
| Naxçıvan Bank | 5 manat | 10 manat |
| Yapı Kredi Bank Azərbaycan | 8 manat4 | 10 manat |
| Azərbaycan Kredit Bankı | 10 manat5 | 2 manat |
| Rabitəbank | 10 manat | 2 manat |
| Bank Technique | 10 manat | 8 manat |
| Beynəlxalq Bank | 10 manat | 10 manat |
| Azər-Türk Bank | 10 manat | 15 manat |
1 rus və ingilis dillərində - 10 manat
2 1000 EUR/USD məbləğində mədaxil edildikdə, hesabın açılması, arayış və çıxarışların verilməsi pulsuzdur
3 Azərbaycan və rus dillərində - 11.8 manat; ingilis dilində - 17.7 manat (18% ƏDV)
4 tələbələr üçün hesabların açılması - 4 manat
5 xarici valyutada hesabın açılması - pulsuz
Qeyd edək ki, məlumatlar mövcud bankların saytlarından toplanmışdır. Bir çox bankda tariflər haqqında məlumatlar paylaşılmadığından banklara zəng edilərək məlumatlar toplanılmışdır.
