Müəllif - Aida İsaq, Banco.az
ABŞ-da "Google"un reklam gəlirlərinin artımı üçüncü rübdə kəskin ləngiyərək təkcə 6 faizə geriləyib. Banco.az xəbər verir ki, bu, pandemiyanın əvvəlindəki rüb istisna olmaqla, 2013-cü ildən bəri ən yavaş artım tempidir.
Amerika bizneslərinin gəlirlərində azalma səbəblərindən biri maliyyə və kriptovalyuta ilə məşğul olan şirkətlərin reklam xərclərinin azalmasıdır. “Maliyyə xidmətlərinin sığorta, kredit, ipoteka və kriptovalyuta kimi alt kateqoriyalarında azalma müşahidə edirik” deyə "Google"un baş kommersiya direktoru Philip Schindler bildirib.
O, 2022-ci ildə kriptovalyutaların kəskin ucuzlaşacağını qeyd edib. Qlobal tənəzzül və enerji böhranı riski fonunda investorlar bu cür alətlərin yüksək riskliliyinə görə rəqəmsal aktivlərini satdılar. Ən populyar kriptovalyutalar "Bitcoin" və "Ethereum" ilin əvvəlindən öz dəyərini 60%-dən çox itirib. Ən böyük kriptovalyuta birjalarından birinin "Coinbase"nin səhmləri isə 70% ucuzlaşıb. Bu şərtlər altında sektordakı şirkətlər xərcləri azaltmaq və işçilərin bir hissəsini ixtisar etmək məcburiyyətində qaldılar və bir çox firma müflis oldu. Bazarlarda bu vəziyyət "Kriptovalyuta qışı" adlandırıldı.
Bununla belə, "Google" kriptovalyuta bazarındakı durğunluğun müvəqqəti olduğuna ümid edir və onun gələcəkdə inkişaf potensialına inanır. "Google" "Coinbase" ilə tərəfdaşlığını gücləndirərək, istifadəçilərə kriptovalyutalardan istifadə edərək şirkətin bulud xidmətlərindən yararlanmaq imkanları yaratdı.
Kriptovalyutaların ucuzlaşmasına baxmayaraq, bəzi ekspertlər hesab edirlər ki, indi bu sahəyə investisiya yatırmaq üçün ən yaxşı fürsətdir. Bununla belə, Aİ-nin yeni sanksiyaları rusların Avropada kriptovalyuta xidmətlərindən istifadəsini, o cümlədən hesabların yaradılması və kripto pul kisələrində rəqəmsal aktivlərin saxlanmasını qadağan etməklə onların rəqəmsal aktivlərə çıxışını çətinləşdirib. İndi qadağa istənilən məbləğə şamil edilir. Əvvəllər Rusiya sakinləri pul kisələrində 10 min avroya qədər hesablarında pul saxlaya bilərdilər.
Bizi sosial şəbəkələrdən izləyin!!
