Müəllif: Tamara Mustafayeva, Banco.az
Texnologiya nəhəngi “Google” Afrika və Avstraliya qitələrini birləşdirən ilk sualtı fiber optik kabel çəkməyə hazırlaşır.
Banco.az xəbər verir ki, “Google” şirkəti qitələri fiber optik kabellə birləşdirir.
“Umoja” adlanan yeni kabel xətti Keniyadan başlayır və müxtəlif ölkələrdən, o cümlədən Konqo Demokratik Respublikası, Ruanda, Uqanda, Zambiya və Zimbabvedən keçir və sonra Cənubi Afrikada quru səyahətini başa çatdırır.
“Google” marşrutun yerüstü hissəsinin tamamlandığını təsdiqləyib. Bildirilib ki, bu hissənin inşası üçün “Liquid Intelligent Technologies” adlı bir şirkətlə əməkdaşlıq edilib.
Kabelin Hind okeanı üzərindən Avstraliyanın Perth şəhərinə çəkilməsi üzrə işlər davam edir, ancaq işlərin başa çatdırılması üçün təsdiqlənmiş vaxt qrafiki yoxdur.
Qeyd edək ki, müasir dünyada “Amazon”, “Meta” və “Microsoft” da daxil olmaqla, texnologiya şirkətlərinin yüzlərlə sərmayəsi dünyanın dənizlərinə, okeanlarına və su yollarına doğru uzanır. Bu sualtı fiber optik kabellər sayəsində texnologiya şirkətləri öz müştərilərinə daha az gecikmə ilə keyfiyyətli məlumat ötürmə və əlaqə xidmətləri təklif edə bilərlər.
Bizi sosial şəbəkələrdən izləyin!!
