"Expressbank"ın xalis mənfəətində üçqat artım | Banco.az

"Expressbank"ın xalis mənfəətində üçqat artım

"Expressbank" ASC 2019-cu ilin 1-ci yarısını (yanvar-iyun dövrünü) 3 milyon 128 min manat xalis mənfəət ilə başa vurub. Ötən ilin eyni dövrü ilə müqayisədə Bankın xalis mənfəti 3,1 dəfə artıb. "Expressbank" 2018-ci ilin 1-ci yarısını 992 min manat xalis mənfəətlə bağlamışdı.

2019-cu ilin yanvar-iyun dövründə ötən ilin eyni dövrü ilə müqayisədə "Expressbank"ın faiz gəlirləri 25,4% artaraq 18 milyon 731 min manat, qeyri-faiz gəlirləri isə 29,7% artaraq 7 milyon 36 min manat təşkil edib.

"Expressbank" ötən ilin 1-ci yarısında faiz gəlirlərinin 1 milyon 224 min manatını ehtiyata ayırmışdı. Bu ilin eyni dövründə isə ehtiyatın 201 min manatı azad olaraq faiz gəlirinə əlavə edilib.

Həm gəlirlərinin artması, həm də ehtiyata vəsaitin ayrılmaması "Expressbank"ın xalis mənfəətinin artmasını təmin edib. Bankın ehtiyata vəsait ayırmaması ehtimal olunan kredit itkilərinin artmaması ilə bağlıdır. 

 

MÜŞTƏRİLƏRƏ VERİLƏN KREDİTLƏR ARTIB

30 İyun 2018-ci il tarixi ilə müqayisədə "Expressbank"ın cəmi aktivləri azalsa da müştərilərə verilən kreditlər artıb.  Bankın aktivləri 20,7% azalaraq 348 milyon 662 min manata düşüb. Bankın aktivlərinin kiçilməsi əsasən müştəri depozitlərinin azalması ilə bağlı olaraq nağd pulun azalması ilə bağlıdır. Müştərilərə verilən kreditlər təxminən 40 milyon manat və ya 19,5% artaraq 30 İyun 2019-cu il tarixində 245 milyon 354 min manata çatıb.

Ən sərfəli kredit üçün müraciət et

Ötən ilin 1-ci yarısının sonu ilə müqayisədə "Expressbank"da müştəri depozitləri 31% azalaraq 180 milyon 366 min manata düşüb. Müştəri depozitlərinin azalması əsasən hüquqi və fiziki şəxslərin hesablarındakı vəsaitin azalması ilə bağlıdır. "Expressbank" hesabatında qeyd edib ki, cari ilin əvvəlindən əhalinin əmanətləri 15% və ya 18.3 milyon manat artmışdır.

 

KAPİTALI AZALIB

2018-ci ilin 1-ci yarısının yekunu ilə müqayisədə Bankın cəmi öhdəlikləri 23,4% azalaraq 225 milyon 934 min manata, cəmi kapitalı isə 15,4% azalaraq 122 milyon 728 min manata geriləyib. Kapitalın azalması ötən ilin zərəri ilə bağlıdır. "Expressbank" 2018-ci ili 23 milyon 755 min manat zərər ilə bağlamışdı.

Qeyd edək ki, "Expressbank" ASC-nin nizamnamə kapitalının 40%-i "Azenco Group" MMC-yə, 25%-i Xammədov Hikmət Hacəmməd oğluna, 17.69%-i "Enerqoservis" MMC-yə, 17%-i Seyidov Hafiz Mirzağa oğluna və 0.31%-i Dövlət Avtomobil Nəqliyyatİ Xidmətinə məxsusdur.

Marja

Ən sərfəli krediti almaq üçün müraciət et