Tamara Mustafayeva, Banco.az
Dünyanın ən innovativ şirkətləri bəlli olub. 50 şirkətin qeyd olunduğu siyahıda bu il Covid-19 pandemiyası zamanı peyvənd və dərman preparatları istehsal edən şirkətlər sürətlə yüksəlib. Texnologiya şirkətlərinin üstünlüyü isə dəyişməz qalıb.
Banco.az xarici mətbuata istinadla bildirir ki, ABŞ-ın "Boston Consulting Group" şirkəti tərəfindən hazırlanan "Ən innovativ şirkətlər 2021" başlıqlı hesabatın nəticələri açıqlanıb. Bu şirkətlərin yarıdan çoxu texnologiya, e-ticarət və istehlak mal və xidmətləri sektorunun təmsilçiləri, 10-u isə peyvənd və dərman sektorunun nümayəndələridir.
Dünyanın ən innovativ şirkətləri siyahısının ilk 4 pilləsi bu il də dəyişməyib. Belə ki, siyahıda "Apple" 1-ci, "Alphabet" 2-ci, "Amazon" 3-cü və "Microsoft" isə 4-cü pillədə qərarlaşıb.
"Tesla" ötən ilə nəzərən 6 pillə yüksələrək beşincı sırada yer alıb. Onu ardıcıl olaraq "Samsung", "IBM", "Huawei" və "Sony" izləyir.
Koronavirus pandemiyasının təsirindən yenidən ilk 50 şirkətin arasına daxil olan "Pfizer" siyahının 10-cu pilləsində özünə yer tapıb. "Johnson & Johnson" və "Novartis"in də olduğu siyahıya digər aparıcı dərman şirkətlərindən "Abbott" və peyvənd istehsal edən digər iki şirkət - "Moderna" və "Astra Zenaca" ilk dəfə daxil olublar.
Qeyd edək ki, siyahıdakı şirkətlərə ölkə baxımından nəzər saldıqda görürük ki, sözügedən 50 şirkətin 27-si ABŞ, 5-i Almaniya, 4-ü Çin, 4-ü Yaponiya, 3-ü Cənubi Koreya, 2-si Hollandiya, 2-si İsveçrə, 1-i İngiltərə, 1-i İspaniya və 1-i Honkonqun payına düşüb.
Bizi sosial şəbəkələrdən izləyin!!
