Müəllif - Eldar Kərimov/Banco.az
Dünyanın yarımkeçirici istehsalçılarının gəliri 2024-cü ildə 18,1% artaraq təxminən 626 milyard dollar təşkil edib.
Araşdırma şirkətinin məlumatına əsasən, bu il gəlirin 705 milyard dollara yüksələcəyi proqnozlaşdırılır.
"Qrafik prosessorlar (GPU) və süni intellekt (AI) prosessorları, xüsusilə də məlumat mərkəzlərində istifadə edilən çiplər 2024-cü ildə əsas inkişaf sürücüsü oldu", – deyə Gartner-in vitse-prezidenti Corc Broklherst bildirib. "Süni intellektə və generativ süni intellektə (GenAI) artan tələbat məlumat mərkəzlərini 2024-cü ildə smartfonlardan sonra ikinci ən böyük yarımkeçirici bazarına çevirdi."
Məlumat mərkəzi seqmentində gəlir 2023-cü ildə 64,8 milyard dollardan 2024-cü ildə 112 milyard dollara yüksəlib.
Yaddaş çiplərinin satışı 2024-cü ildə 71,8% artıb və ümumi çip bazarındakı payı 25,2%-ə çatıb.
Digər çip növlərinin satışı isə 6,9% artım nümayiş etdirib.
2024-cü ildə ən böyük 25 çip istehsalçısından 11-i ikiqat gəlir artımı əldə edib, lakin 8 şirkətin gəliri azalıb.
Samsung Electronics, Intel-i geridə qoyaraq 2024-cü ildə dünyanın ən böyük çip istehsalçısı adına yenidən sahib olub. Nvidia və SK Hynix 80%-dən çox gəlir artımı göstərərək iki pillə irəliləyib.
Ən böyük çip istehsalçılarının gəliri (milyard dollar):
| Sıra (2024) | Sıra (2023) | Şirkət | Gəlir (2024) | Gəlir (2023) | Dəyişiklik | Bazar payı (2024) |
|---|---|---|---|---|---|---|
| 1 | 2 | Samsung Electronics | 66,524 | 40,942 | +62,5% | 10,6% |
| 2 | 1 | Intel | 49,189 | 49,117 | +0,1% | 7,9% |
| 3 | 5 | Nvidia | 45,988 | 25,053 | +83,6% | 7,3% |
| 4 | 6 | SK Hynix | 42,824 | 23,027 | +86,0% | 6,8% |
| 5 | 3 | Qualcomm Inc. | 32,358 | 29,225 | +10,7% | 5,2% |
| 6 | 12 | Micron Technology | 27,843 | 16,123 | +72,7% | 4,4% |
| 7 | 4 | Broadcom | 27,641 | 25,613 | +7,9% | 4,4% |
| 8 | 7 | Advanced Micro Devices | 23,948 | 22,307 | +7,4% | 3,8% |
| 9 | 8 | Apple Inc. | 18,88 | 18,052 | +4,6% | 3,0% |
| 10 | 9 | Infineon Technologies | 16,001 | 17,022 | -6,0% | 2,6% |
| - | - | Digər şirkətlər | 274,775 | 263,483 | +4,3% | 43,9% |
| Cəmi | - | Ümumi gəlir | 625,971 | 529,964 | +18,1% | 100% |
