Tamara Mustafayeva, Banco.az
BMT-nin Ümumdünya Turizm Təşkilatı (ÜTT) 2021-ci ilin ilk rübündə dünya üzrə turist sayının ötən ilin eyni dövrü ilə müqayisədə 83% azaldığını açıqlayıb.
Banco.az xarici mətbuata istinadla bildirir ki, mərkəzi ofisi İspaniyanın Madrid şəhərində yerləşən ÜTT yeni növ koronavirus pandemiyasından ən çox zərər çəkənlərdən biri olan turizm sektorunda bu ilin yanvar-mart ayları ərzində ötən ilin eyni dövrü ilə müqayisədə 183 milyon daha az turistin səyahət etdiyini, bunun isə öz növbəsində 83%-lik geriləməyə müvafiq olduğunu bildirib.
Turist sayı üzrə ən böyük geriləmənin Asiya-Sakit Okean (91%) bölgəsinin payına düşdüyü, bu bölgəni 83%-lə Avropa, 81%-lə Afrika, 78%-lə Orta Şərq və 71%-lə Amerikanın izlədiyi vurğulanıb.
Pandemiya səbəbilə 2020-ci ilin turizm sektorunun ən pis ili kimi qeyd edildiyini xatırladan Ümumdünya Turizm Təşkilatı sektor üzrə etibarlılığın yavaş-yavaş bərpa edildiyini də vurğulayıb.
Qeyd edək ki, sektor mütəxəssisləri may-avqust ayları ərzində turist sayında artım müşahidə ediləcəyi və dünya üzrə vaksinasiya proseslərinin sürətləməsinin bazarda yeni ümidlər vəd edəcəyinə dair öz proqnozlarını irəli sürürlər.
Bizi sosial şəbəkələrdən izləyin!!
