Müəllif:Mehin Qasımova,Banco.az
Çərşənbə axşamı səhər OPEC+ ölkələrindən yanacağın tədarükünün növbəti artımı ilə bağlı narahatlıqlar fonunda neft qiymətləri mülayim şəkildə enməyə davam edib.
Banco.az xəbər verir ki, Londonun ICE Futures birjasında Brent markalı dekabr fyuçersləri 0,18 dollar (0,27%) ucuzlaşaraq 65,44 dollar/barelə bərabər olub. Bazar ertəsi Brent markalı neft 0,32 dollar (0,5%) ucuzlaşaraq 65,62 dollar/barel olub.
Nyu-Yorkun NYMEX əmtəə birjasında keçirilən elektron ticarət əməliyyatlarının gedişində WTI markalı neftin dekabr fyuçersləri 0,18 dollar (0,29%) ucuzlaşaraq 61,13 dollar/barelə bərabər olub. Əvvəlki sessiyada müqavilə bir barel üçün 0,19 dollar (0,3%) ucuzlaşaraq 61,31 dollar olub.
Könüllü olaraq hasilatı azaldan səkkiz OPEC+ ölkəsi dekabrda tədarükün daha mülayim artımını planlaşdırır. Dekabrın kvotalarını müzakirə etmək üçün bu ölkələrin nümayəndələrinin görüşü noyabrın 2-nə planlaşdırılır.
Bazar iştirakçıları da cümə axşamı APEC sammitində ABŞ prezidenti Donald Tramp və Çin sədri Si Cinpin arasında keçiriləcək görüşü gözləyirlər. ABŞ-ın maliyyə naziri Skott Bessent bəyan edib ki, ABŞ və Çin tərəfləri Pekinə 100% rüsumların tətbiqindən yayınacaq ticarət sazişinin əsas müddəaları üzərində razılaşıblar.
