Müəllif:Mehin Qasımova,Banco.az
ABŞ-ın Venesuela neft sektoruna qarşı sanksiyaları fonunda Çin neft emalı zavodları bir müddətlik fasilədən sonra Venesueladan xam neft alışını yenidən bərpa ediblər.
Banco.az xəbər verir ki, bu barədə rəsmi mənbələr qeyd edib.
Yanvarın əvvəlində baş verən siyasi gərginlik və kəşfiyyat əməliyyatları ilə bağlı xəbərlərdən sonra Çin tərəfi Venesuela ilə bütün sövdələşmələri müvəqqəti dayandıraraq alternativ təchizatçılara yönəlmişdi. Qeyd edək ki, Çin uzun müddət Venesuela neftinin əsas alıcılarından biri olub və ABŞ sanksiyalarına baxmayaraq xam nefti endirimli qiymətlərlə əldə edirdi.
Mənbələrin bildirdiyinə görə, vəziyyətin nisbətən sabitləşməsindən sonra Çin neft emalı zavodları alışları mərhələli şəkildə bərpa ediblər. Lakin Venesueladan Çinə göndərilən xam neftin həcmi və müqavilə şərtləri açıqlanmır.
Çin tərəfi məsələ ilə bağlı rəsmi şərh verməyib. Dünyanın ən böyük neft idxalçısı olan Çin emal sektorunda iki əsas seqment mövcuddur:
Dövlətə məxsus neft emalı zavodları sanksiya risklərinə görə daha ehtiyatlı davranır;
Özəl emalçılar isə Venesuela ilə yanaşı İran və Rusiya kimi sanksiyalara məruz qalan ölkələrdən xam neft alışını aktiv şəkildə davam etdirirlər.
Qeyd olunur ki, son həftələrdə regional təchizat zəncirində yaranan problemlər fonunda Rusiya neft ixracatçıları Çin bazarını qorumaq üçün maksimum endirimlər təklif etməyə başlayıblar. Bu isə Çin üçün alternativ mənbələr arasında rəqabəti daha da gücləndirib.
