Müəllif:Mehin Qasımova,Banco.az

ABŞ Prezidenti Donald Tramp Çin Prezidenti Si Cinpinin 24 sentyabr tarixində ABŞ-a rəsmi səfər edəcəyini açıqlayıb.

Banco.az xəbər verir ki, səfər bu ilin əvvəlində Trampın Çinə etdiyi səfər zamanı Pekində iki lider arasında keçirilən görüşün davamı kimi qiymətləndirilir. Həmin görüş zamanı ABŞ prezidenti Si Cinpini Ağ Evə dəvət etmişdi.

Tramp bildirib ki, tərəflər Pekində başladılan müzakirələri Vaşinqtonda davam etdirəcəklər. Onun sözlərinə görə, görüşün əsas mövzularından biri süni intellekt sahəsində əməkdaşlıq və bu istiqamətdə qlobal inkişaflar olacaq.

Bu arada, ABŞ dövlət katibi Marko Rubio ilə Çinin xarici işlər naziri Vanq Yi arasında keçirilən son görüşdə də qarşıdakı səfərin gündəliyi müzakirə olunub. Tərəflər səfərin uğurlu keçməsi üçün əməkdaşlıq edilə biləcək sahələrin müəyyənləşdirilməsi istiqamətində fikir mübadiləsi aparıblar.

Gözlənilən görüşün ABŞ–Çin münasibətlərində dialoqun genişlənməsinə və strateji məsələlər üzrə təmasların davam etdirilməsinə töhfə verəcəyi gözlənilir.