Müəllif:Ayşən İmanova/Banco.az

Çinin dövlət taxıl ehtiyatı müəssisələrinin fermerlərdən və istehsalçılardan təxminən 420 milyon ton taxıl alacağı gözlənilir.

Banco.az xəbər verir ki, bu barədə “Sinxua” agentliyi məlumat yayıb.

Beləliklə, satınalmaların həcmi ardıcıl  ikinci il 400 milyon tonu ötəcək.

Ərzaq və Strateji Ehtiyatlar üzrə Ümumçin İşçi Konfransına əsasən, ölkə taxıl tədarükü işinin təşkili və əlaqələndirilməsini gücləndirib və fermerlər üçün taxıl satış kanallarını sadələşdirmək üçün çoxsaylı tədbirlər həyata keçirib.

Agentlik qeyd edir ki, minimum taxıl alış qiyməti siyasəti ilə yanaşı, taxıl tədarükü Çinin makro nəzarət tədbirlərinin mühüm hissəsidir, çünki o, milli ərzaq təhlükəsizliyinin təmin edilməsində, ərzaq qiymətlərinin sabitliyinin qorunmasında, fermerlərin maraqlarının qorunmasında və fövqəladə tədarükün təmin edilməsində əsas rol oynayır.

Qeyd edilib ki, bu ilin sonuna qədər ölkənin yaxşı vəziyyətdə olan standart anbar tutumu on il əvvəlkindən 36 faiz artaraq 700 milyon tonu keçəcək.

2024-cü ildə Çində taxıl istehsalı rekord həddə çataraq 706,5 milyon ton təşkil edib ki, bu da ötən illə müqayisədə 1,6 faiz çoxdur. Dövlət Statistika İdarəsinin məlumatına görə, 2024-cü ildə ölkədə ilk dəfə olaraq 700 milyon tondan çox taxıl yığılıb