Müəllif: Tamara Mustafayeva, Banco.az
BVF-in keçmiş baş iqtisadçısı Qopinat: Qlobal nizam daimi olaraq dəyişib.
Banco.az xəbər verir ki, Beynəlxalq Valyuta Fondunun (BVF) sabiq baş iqtisadçısı və Harvard Universitetinin iqtisadiyyat professoru Gita Qopinat Davosda jurnalistlərə verdiyi açıqlamada qlobal iqtisadiyyatın dərin bir transformasiya prosesindən keçdiyini bildirib.
Qopinat qlobal nizamın artıq qalıcı şəkildə dəyişdiyini vurğulayaraq, dünyanın hətta bir il əvvəllə müqayisədə belə çox fərqli bir nöqtədə olduğunu qeyd edib. O, bu yeni mərhələdə ölkələrin daha çox daxilə yönəlmiş siyasətlər apardığını və yeni ittifaqların formalaşdığını söyləyib.
ABŞ, Avropa və Çin arasında iqtisadi ayrışmanın miqyasının hələ tam olaraq aydınlaşmadığını deyən Qopinat buna baxmayaraq, əsas etibarilə tamamilə fərqli bir qlobal mühitdə yaşandığını ifadə edib.
İqtisadi artımla bağlı dəyərləndirmələrində Qopinat qısa və uzunmüddətli perspektivi əhatə edən iki mərhələli bir ssenari irəli sürüb. Qısa və orta müddətdə ölkələrin enerji təhlükəsizliyinə yönəlik investisiyalarının və müdafiə sənayesini gücləndirmə səylərinin keçid dövrlərində iqtisadi artımı dəstəkləyə biləcəyini bildirib.
Uzun müddətdə isə mövcud siyasət qeyri-müəyyənliklərinin və qlobal miqyaslı xaosun davam etməsi halında bunun qaçılmaz şəkildə aşağı iqtisadi artım templərinə yol açacağını vurğulayıb.
Bizi sosial şəbəkələrdən izləyin!!
