"ABŞ tarifləri qlobal iqtisadiyyat üçün əhəmiyyətli risk yaradır".

Banco.az xəbər verir ki, bunu Beynəlxalq Valyuta Fondunun (BVF) icraçı direktoru Kristalina Georgiyeva yazılı açıqlamasında bildirib.

"Biz hələ də elan edilmiş tarif tədbirlərinin makroiqtisadi təsirini qiymətləndiririk, lakin onlar açıq şəkildə artımın yavaş olduğu bir vaxtda qlobal iqtisadi perspektiv üçün əhəmiyyətli risk yaradır. Qlobal iqtisadiyyata daha çox zərər vura biləcək addımlardan qaçmaq vacibdir. Biz ABŞ və onun ticarət tərəfdaşlarını ticarət gərginliyini həll etmək və qeyri-müəyyənliyi azaltmaq üçün konstruktiv işləməyə çağırırıq", - fondun rəhbəri əlavə edib.

Onun sözlərinə görə, BVF-nin tariflərin nəticələri ilə bağlı araşdırmasının nəticələri ayın sonunda qlobal iqtisadi inkişaf perspektivlərinə dair hesabatında dərc olunacaq.

Qeyd edək ki, aprelin 2-də Tramp 185 ölkə və ərazinin məhsullarına gömrük rüsumunun tətbiq ediləcəyini bəyan edib. O, idxal olunan mallara minimum rüsum dərəcəsini 10% müəyyən edəcəyini bildirib.