Müəllif:Ayşən İmanova/Banco.az

Finlandiyanın “Finnair” aviaşirkəti, pilotların tətili ilə əlaqədar olaraq, dekabrda təxminən 33 min müştəriyə təsir edəcək 300-ə yaxın uçuşu ləğv edəcək.

Banco.az xəbər verir ki, bu barədə şirkətin mətbuat xidməti məlumat yayıb.

"Fin Pilotlar İttifaqının danışıqlar aparmaq əvəzinə tətilə qərar verməsi məyusedicidir. Təəssüf ki, bu, Milad öncəsi mövsümdə minlərlə müştərimizin səyahət planlarını pozur. Biz bu çətin vəziyyətdə belə müştərilərimizə yaxşı xidmət göstərmək üçün əlimizdən gələni edirik və mümkün qədər çox müştəriyə alternativ uçuşlar təklif edəcəyik", - şirkətdən bildirilib.

Qeyd edilib ki, "Finnair" dekabrın 9-da 140-a yaxın, dekabrın 13-də isə 150-yə yaxın reysi ləğv edəcək.

Tətil sentyabrın 30-da həmkarlar ittifaqı ilə daşıyıcı arasında bağlanmış kollektiv əmək müqaviləsinin müddətinin başa çatması ilə əlaqədardır. Yeni müqavilə üzrə danışıqlar üç aydır ki, heç bir irəliləyiş əldə edilmədən davam edir.