Tamara Mustafayeva, Banco.az
Beynəlxalq Əmək Təşkilatı (ILO) Covid-19 böhranının başa çatma ehtimalının hələ uzaq olduğuna dair xəbərdarlıq edərkən eyni zamanda 2021-ci ilin ilk rübündə iş saatları üzrə 4,8% itki müşahidə olunduğunu, bunun isə öz növbəsində 140 milyon insanın işini itirməsi ilə nəticələndiyini açıqlayıb.
Banco.az xarici mətbuata istinadla bildirir ki, Beynəlxalq Əmək Təşkilatı (ILO) "Məşğulluq və Dünyanın Sosial Mənzərəsi: Meyillər 2021" başlıqlı hesabatı Dünya Səhiyyə Təşkilatının "Covid-19"u pandemiya elan etməsindən təqribən 15 ay sonra yayımlayıb.
ILO Baş Direktoru Guy Ryder Cenevrə şəhərindən video-konfrans vasitəsilə həyata keçirdiyi mətbuat konfransında, "2021-ci ilin ilk rübündə pandemiya səbəbilə ümumi iş saatı üzrə 4,8% itki qeydə alınıb və bu da 140 milyon tamştatlı işə müvafiqdir", deyə bildirib.
Ryder qlobal işsizlik göstərcisinin 2019-cu ildə 187 milyon olduğunu, 2022-ci ildə isə bu rəqəmin 205 milyona çatmasını proqnozlaşdırdıqlarını vurğulayıb. O, həmçinin bildirib ki, bununla da qlobal işsizlik nisbətinin 5,7% səviyyəsinə çatacağı ehtimal edilir.
Qeyd edək ki, ILO hesabatında Covid-19 pandemiyasının səbəb olduğu iqtisadi böhrandan bu ilin ilk rübündə ən çox zərər çəkən bölgələrin isə Latın Amerikası, Karib hövzəsi və Mərkəzi Asiya olduğu bildirilib.
Bizi sosial şəbəkələrdən izləyin!!
