Bu Bankın mənfəəti 5 dəfə artıb | Banco.az

Bu Bankın mənfəəti 5 dəfə artıb

“Turanbank”ın müştərilərə verdiyi kreditlər və gəlirləri artıb

“Turanbank” ASC 2019-cu ilin 9 ayının (yanvar-sentyabr) dövrünü 329 min manat xalis mənfəət ilə başa vurub. Bu, ötən ilin eyni dövrü ilə müqayisədə 5 dəfə çoxdur. “Turanbank” 2018-ci ilin 9 ayını 65 min manat xalis mənfəət ilə bağlamışdı. Xalis mənfəətin artması depozit və kredit itkiləri üçün yaradılan ehtiyata ayırmanın 2 dəfəyə yaxın azalması ilə bağlıdır. Bankın biznes fəaliyyətinin nəticəsini daha dəqiq əks etdirən əməliyyat mənfəəti isə xərclərin artması ilə əlaqədar olaraq azalıb.

Cari ilin yanvar-iyun dövründə “Turanbank”ın cəmi gəlirləri 28 milyon 181 min manat, cəmi xərcləri isə 27 milyon 520 min manat təşkil edib. Gəlirlər xərcləri üstələdiyindən Bankın 661 min manat əməliyyat mənfəəti yaranıb. Bank əməliyyat mənfəətinin 332 min aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırıb.

Müqayisə üçün qeyd edək ki, ötən ilin 9 ayı ərzində “Turanbank”ın cəmi gəlirləri 25 milyon 287 min manat, cəmi xərcləri 24 milyon 590 min manat, əməliyyat mənfəəti 697 min manat təşkil etmişdi. Bank həmin dövrdə əməliyyat mənfəətinin 633 min manatını aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırmışdı.

Ən sərfəli kredit üçün müraciət et

 

XƏRCLƏRİN ARTMASI GƏLİRLƏRİN ARTMASINI SİLİB

Ötən ilin 9 ayı ilə müqayisədə cari ilin 9 ayında “Turanbank”ın cəmi gəlirlərinin 2 milyon 894 min manat artması ilə bərabər cəmi xərcləri 2 milyon 930 min manat artıb. Cəmi xərclər cəmi gəlirlərdən daha çox ardığından “Turanbank”ın əməliyyat mənfəəti 36 min manat azalıb.

Xalis mənfəətin 5 dəfə artması ehtimal olunan depozit və kredit itkiləri üçün yaradılan ehtiyata ayırmanın 1,9 dəfə azalması ilə bağlıdır (633 min manatdan 332 min manata düşüb).

 

BANK BÖYÜYÜB, MÜŞTƏRİLƏRƏ VERİLƏN KREDİTLƏR ARTIB

30 Sentyabr 2019-cu il tarixində “Turanbank” 517 milyon 997 min manat cəmi aktivlərə malik olub. Aktivlərin 335 milyon 367 min manatını müştərilərə verilən kreditlər təşkil edib. Ötən ilin sonunda Bankın cəmi aktivləri 492 milyon 606 min manat, o cümlədən müştərilərə verilən kreditlər 313 milyon 80 min manat təşkil etmişdi.

Marja

Ən sərfəli krediti almaq üçün müraciət et