Böyük Britaniya şirkətləri 2020-ci ildən bəri ən yüksək səviyyədə işçi ixtisarına gediblər.

Banco.az xəbər verir ki, Milli Statistika İdarəsinin (ONS) yaydığı hesabata əsasən, ölkədə iş yerlərinin sayı bir ay ərzində 43 min nəfər azalıb. Bu, pandemiya dövründən sonra qeydə alınan ən sürətli azalma tempidir.

Məlumata görə, statistik göstəricilər Böyük Britaniyanın vergi orqanları tərəfindən toplanan inzibati məlumatlara əsaslanır. ONS qeyd edir ki, bu rəqəmlər sonradan əhəmiyyətli düzəlişlərə məruz qala bilər.

Hesabatda əmək haqqı dinamikasına da toxunulub. Belə ki, bonuslar nəzərə alınmadan Böyük Britaniyada orta əmək haqqı sentyabr–noyabr aylarında illik müqayisədə 4,5 faiz artıb. Bu göstərici avqust–oktyabr dövründəki 4,6 faizlik artımla müqayisədə zəifləmə nümayiş etdirərək son üç il yarımın ən aşağı artım səviyyəsi olub.