Müəllif: Tamara Mustafayeva, Banco.az
BRİKS ölkələrində ümumi investisiya qoyuluşları 45 trilyon dollara çatıb.
Banco.az xəbər verir ki, investisiya qoyuluşu ilə vətəndaşlıq və yaşayış icazəsi üzrə konsaltinq şirkəti olan “Henley & Partners” və qlobal sərvət araşdırma şirkəti “New World Wealth” tərəfindən hazırlanan “BRİKS Sərvət Hesabatı” dərc olunub.
Hesabata görə, dünyanın aparıcı inkişaf etməkdə olan iqtisadiyyatlarından ibarət qrupda (Braziliya, Rusiya, Hindistan, Çin, Cənubi Afrika) investisiya edilə bilən aktivləri 1 milyon dollardan çox olan 1,6 milyon insan və 549 milyarder var.
Bununla yanaşı, BRİKS qrupu bu ay yeni Yaxın Şərq və Şimali Afrika (MENA) üzvləri Misir, Efiopiya, İran, Səudiyyə Ərəbistanı və BƏƏ-nin əlavə edilməsi ilə əhəmiyyətli dərəcədə yeni maliyyə və geosiyasi təsir gücü əldə edib.
BRİKS bloku hazırda dünya əhalisinin 45 faizindən çoxunu təmsil edir və alıcılıq qabiliyyəti pariteti (PPP) üzrə qlobal ÜDM-də G7 ölkələrindən daha böyük paya malikdir. Belə ki, G7 ölkələri 30 faiz, BRICS bloku isə 36 faiz paya malikdir.
Növbəti onillik üçün özəl aktivlərin artımı proqnozlarının da yer aldığı hesabatda Hindistan 2033-cü ilə qədər adambaşına sərvətdə 110 faiz artımla BRİKS qrupuna başçılıq edir. Yaxın 10 ildə adambaşına sərvətinin 105 faizdən çox artacağı gözlənilən Səudiyyə Ərəbistanı ikinci, 95 faizlə BƏƏ üçüncü yerdədir.
Bizi sosial şəbəkələrdən izləyin!!
