Müəllif:Gülbəniz Hüseynli/Banco.az
Oktyabrın 8-də rejissor Cullen Hoback tərəfindən HBO-da "Elektron Pullar: Bitcoin Sirri" (Electric Money: The Bitcoin Mystery) adlı yeni sənədli film təqdim edildi.
Banco.az xəbər verir ki, filmin təqdimatından sonra Bitcoin-in yaradıcısı Satoshi Nakamoto-nun kimliyi ilə bağlı araşdırma aparılıb. Məlum oldu ki, Bitcoin-in gizli yaradıcısı 39 yaşlı developer Peter Todd ola bilər.
O, Bitcoin-in inkişafının ilkin dövrlərində fəal iştirak edib və bir sıra protokolların yaradılmasında mühüm rol oynayıb. Todd, onlayn kriptovalyuta icmalarında aktiv olub və Bitcoin-in ilk illərində vacib fiqurlardan biri kimi çıxış edib.
Xatırladaq ki, avstraliyalı sahibkar Craig Wright uzun illər boyu özünü Satoshi Nakamoto kimi tanıtmağa çalışıb və bu iddianı sübut etmək üçün bir çox məhkəmə prosesində iştirak edib. Nəhayət, 2024-cü ilin iyul ayında Wright, kriptovalyutanı icad etmədiyini və yanlış ifadələr verdiyini etiraf edib.
Satoshi Nakamoto, Bitcoin-in və onun əsas texnologiyası olan blokçeyn sisteminin yaradıcısı kimi tanınan anonim bir şəxs və ya qrupun təxəllüsüdür. Nakamoto-nun kimliyi hələ də tam müəyyən edilməyib, buna görə də onun əsl şəxsiyyəti sirr olaraq qalır. Nakamoto ilk dəfə 2008-ci ildə yayımlanan və Bitcoin-i təsvir edən elmi məqalədə (white paper) ortaya çıxıb. Bu məqalədə, Satoshi Nakamoto rəqəmsal valyuta olan Bitcoin-i mərkəzsizləşdirilmiş, vasitəçilərə ehtiyac olmadan işləyən bir sistem kimi izah edib.
2009-cu ildə Nakamoto Bitcoin-in ilk versiyasını yaratdıqdan sonra 2010-cu ilə qədər Bitcoin icmasının aktiv üzvü idi, sonra isə layihəni digər developerlərə təhvil verərək kənara çəkildi. Nakamoto-nun Bitcoin inkişafında iştirakı dayandıqdan sonra onunla heç bir ictimai əlaqə qurulmayıb.
Satoshi Nakamoto-nun kimliyi ilə bağlı çoxlu fərziyyələr var, lakin heç bir dəqiq sübut yoxdur. Bir neçə fərqli şəxs, o cümlədən developer Hal Finney, Nick Szabo, Dorian Nakamoto və avstraliyalı sahibkar Craig Wright kimi şəxslər bu adla əlaqələndirilib, lakin heç biri qəti şəkildə təsdiqlənməyib. Nakamoto-nun təxminən bir milyona yaxın Bitcoin-ə sahib olduğu güman edilir, bu da onu dünyanın ən varlı insanlarından biri edə bilər.
