2017-ci ildə bitkoin investorların kriptovalyutalara qarşı müsbət münasibətindən nəticəsi olaraq 1 375% bahalaşsa da, bu il vəziyyət kəskin dəyişib.
Rusiya mətbuatına istinadən xəbər verilir ki, 2018-ci ilin I rübü bitkoinin dövriyyəyə buraxıldığı 2010-cu ildən indiyə qədər onun üçün 2-ci ən uğursuz rüb olub.
Yanvar-mart aylarında kriptovalyuta 50% dəyər itirib və 6 900 ABŞ dolları səviyyəsində qərarlaşıb. Bundan daha pis vəziyyət isə 2011-ci ilin III rübündə qeydə alınıb. Həmin vaxt bitkoin 68% dəyərdən düşüb. Onu da qeyd edək ki, əgər 2011-ci ildəki rekord azalma vaxtı investorlar hər bitkoin üçün 11 dollar itirdikləri halda, 2018-ci ildə bu məbləğ 6 750 dollar təşkil edib.
Bitkoinin ucuzlaşması kriptovalyuta bazarında baş verən enmələr fonunda baş verib. Belə ki, efiriumun qiyməti bu il yanvar ayının ortasında 1 369 dollara çatsa da, rübün sonunda bu rəqəm 394 dollar olub. Yəni, rkiptovalyuta 70%-dən çox ucuzlaşıb. "Ripple"in qiyməti isə yanvarın 4-dəki 3,84 dollardan 0,52 dollara düşüb. Hesabat dövründə kriptovalyuta bazarının ümumi kapitallaşması isə 54% azalaraq 277 mlrd. dollar təşkil edib.
Mənbə: Report.az
