Vergi Məcəlləsinə 2 maddənin əlavə olunması təklif olunur:

“102.1.22-1. Qanunla müəyyən olunmuş qaydada gəlirlərin və xərclərin uçotunu aparan, ƏDV-nin məqsədləri üçün qeydiyyata alınmayan və əməliyyatlarının həcmi ardıcıl 12 aylıq dövrün istənilən ayında (aylarında) 200.000 manatadək olan rezident müəssisənin təsisçisi (payçısı) və yaxud səhmdarları olan fiziki şəxslərin dividend gəlirləri;”

106.10. Qanunla müəyyən olunmuş qaydada gəlirlərin və xərclərin uçotunu aparan, ƏDV-nin məqsədləri üçün qeydiyyata alınmayan və əməliyyatlarının həcmi ardıcıl 12 aylıq dövrün istənilən ayında (aylarında) 200.000 manatadək rezident müəssisənin təsisçisi (payçısı) və yaxud səhmdarları olan hüquqi şəxslərin dividend gəlirləri vergidən azaddır.”;

Vergi eksperti Vəli Əliyev bununla bağlı bildirir ki, bu dəyişikliklər bərabərlik prinsipini pozur və daha az dövriyyənin olmasını stimullaşdırır:

“Bərabərlik prinsipinin pozulmasını aşağıdakı misalda izah edirəm.

İki vətəndaş və hər birinin tək başına təsis etdikləri iki ayrı hüquqi şəxs təsəvvür edək. Bu iki hüquqi şəxsin faəliyyət növünün də eyni olduğunu düşünək və hesab edək ki, hər iki hüquqi şəxs mühasibat xidməti göstərir. Bunlardan birinin illik gəliri 201 min olduğu üçün ƏDV ödəyicisi, digərinin illik gəliri 199 min olduğu üçün sadələşdirilmiş verginin ödəyicisidir. Təqvim ili başa çatdıqdan və büdcəyə ödənişlər aparıldıqdan sonra hər birinin bölüşdürülməli xalis mənfəəti 10000 manat təşkil edir və həmin xalis gəlir divident şəklində təsisçilərə verilir. 

Məcəlləyə təklif olunan dəyişikliyə əsasən ƏDV ödəyicisi olan hüquqi şəxsin təsisçisinin (həmin təsisçi hüquqi və yaxuq fiziki şəxs ola bilər) əldə etdiyi dividentdən 10 % vergi tutulacaq, lakin digər hüquqi şəxsin təsisçiyə ödədiyi divident vergidən azad olacaq. Eyni zamanda yuxarıda qeyd olunan maddələr qüvvəyə minərsə qanunvericilik daha az dövriyyənin olmasını stimullaşdırır. Halbuki, əksinə olmalı idi. Nəticədə Qanunda bərabərlik prinsipi pozulur”. 

Marja.az