Müəllif:Mehin Qasımova,Banco.az

Birləşmiş Ərəb Əmirliklərinin (BƏƏ) Xarici İşlər Nazirliyi İranla bütün kommersiya fəaliyyətlərinin, ticarət və maliyyə əməliyyatlarının növbəti xəbərdarlığa qədər dayandırıldığını açıqlayıb.

Banco.az xəbər verir ki, BƏƏ-nin rəsmi xəbər agentliyi WAM-ın verdiyi məlumata görə, İranla bütün ticarət, iqtisadi fəaliyyətlər və maliyyə əməliyyatları növbəti xəbərdarlığa qədər dayandırılıb.

Qərarın əhatə dairəsi və icra detalları ilə bağlı hələlik ətraflı məlumat verilməyib.

Bəyanat BƏƏ Müdafiə Nazirliyinin İrandan qaynaqlandığı müəyyən edilən iki ballistik raketin dəniz naviqasiyasını hədəf alaraq dənizə düşdüyünü açıqlamasından sonra verilib.

Qeyd edək ki, ABŞ və İsrailin İrana birgə hücumlarından sonra Yaxın Şərqdə gərginlik artıb. 

İyun ayının ortalarında İran və ABŞ Pakistanın vasitəçiliyi ilə müharibəyə son qoymaq və davamlı sülh razılaşmasına nail olmaq məqsədi daşıyan anlaşma memorandumu imzaladılar.

Lakin, müqavilənin şərtləri və qlobal enerji ixracı üçün vacib olan Hörmüz boğazında naviqasiya ilə bağlı davam edən fikir ayrılıqları səbəbindən danışıqlar sonradan dayandırıldı.